रचिन रवींद्र के चोटिल होय के बाद न्यूजीलैंड की टीम मा बड़ बदलाव कीन गा अहै अउर भारत के खिलाफ टी-20 सीरीज खातिर नई टीम क ऐलान कीन गा अहै।
न्यूजीलैंड के ऑलराउंडर रचिन रवींद्र भारत के खिलाफ होवे वाली पांच मैचन की टी-20 सीरीज से बाहर होइ गए हें। पिछले हफ्ता एक प्रमोशनल शूट के टेम उनके कान्धा मा चोट लागि गय रही अउर अब उनका ठीक होय मा कम से कम छह हफ्ता लागि जइहैं। वनडे सीरीज मा उइ वापसी करि सकत हें। टी-20 सीरीज 22 अक्टूबर से अउर वनडे सीरीज 4 नवंबर से सुरु होइ।
न्यूजीलैंड के हेड कोच रॉब वॉल्टर कहेन, “रचिन के तईं हमका बहुतै बुरा लागत अहै। ई गर्मी के सीजन मा उइ हमरे खातिर बहुत जरूरी रोल निभावे वाले हें, येहारे ई जरूरी अहै कि उइ अपनी रिकवरी मा कउनो जल्दबाजी न करैं। हमका उम्मेद अहै कि उइ वनडे सीरीज खातिर वापस आइ जइहैं।”
रचिन के न रहै पर मिडिल-ऑर्डर मा एक विकल्प के तौर पर बेवॉन जैकब्स का टीम मा सामिल कीन गा अहै। उइ 11 टी-20 मैच खेले हें अउर बांग्लादेश के खिलाफ अपने पिछला मैच मा नाबाद 62 रन बनाय के बाद ई सीरीज मा आवत हें।
न्यूजीलैंड अपने तेज गेंदबाज वाले ग्रुप मा एडम मिल्ने का भी सामिल कीहिस अहै। टीम मा लॉकी फर्ग्यूसन, मैट हेनरी, काइल जैमीसन, जैकब डफी, जैक फॉल्क्स अउर नाथन स्मिथ सामिल हें। मिल्ने एक साल से ढेर टेम के बाद आपन पहिला टी-20 मैच खेलै की रेस मा हें। वहीं, बेन सियर्स के नाउं पर विचार नाहीं कीन गा काहे से उइ टखना की चोट से उबरत हें।
न्यूजीलैंड टीम: मिचेल सेंटनर (कप्तान), फिन एलन, माइकल ब्रेसवेल, मार्क चैपमैन, डेवोन कॉनवे, जैकब डफी, लॉकी फर्ग्यूसन, जैक फॉल्क्स, मैट हेनरी, बेवन जैकब्स, काइल जैमीसन, एडम मिल्ने, डेरिल मिचेल, ग्लेन फिलिप्स, टिम साइफर्ट, नाथन स्मिथ।
टी-20 सीरीज क कार्यक्रम:
पहिला टी-20: 22 अक्टूबर
दूसरा टी-20: 24 अक्टूबर
तीसरा टी-20: 27 अक्टूबर
चौथा टी-20: 30 अक्टूबर
पांचवां टी-20: 1 नवंबर
