भारतीय सिनेमा जगत क सबसे नीक सस्पेंस थ्रिलर फ्रेंचाइज के बात कीन जाय तौ ओमा मोहनलाल क फिल्म ‘दृश्यम’ क नांव जरूर आवत है। मलयालम सिनेमा के साथै-साथ बॉलीवुड मा भी ई फ्रेंचाइज खूबै सफलता पाइस है। पिछले दुइ भागन के सुपरहिट होय के बाद अब मोहनलाल क ‘दृश्यम 3’ आवत है, जेकर टीजर मेकर्स कइती से रिलीज कइ दीन गवा है। सस्पेंस से भरल ‘दृश्यम 3’ के ई टीजर मा जॉर्ज कुट्टी का अबकी तीन गुना बेसी मुसीबतन क सामना करे का परी। आवा एक नज़र निर्देशक जीतू जोसेफ क ‘दृश्यम 3’ के ई ताजा टीजर पर डारी जाय।
सामने आवा ‘दृश्यम 3’ क टीजर
मंगलवार का मेकर्स कइती से ई एलान कीन गवा रहा कि बुधवार का मोहनलाल स्टारर ‘दृश्यम 3’ क टीजर रिलीज कीन जाई। ओही आधार पर 29 अप्रैल क संझा का ‘दृश्यम पार्ट 3’ क पहिली झलक सामनें आई, जेहमा अभिनेता मोहनलाल जॉर्ज कुट्टी के किरदार मा नजर आए। ई टीजर वीडियो का मोहनलाल अपने ऑफिशियल एक्स हैंडल पर शेयर कीन है।
मलयालम ‘दृश्यम 3’ के ई टीजर मा आप देख सकत हव कि पिछले दुइ भागन के सीन मिलावा गा है। आखिर मा जॉर्ज कुट्टी ‘फाइनल चैप्टर’ मा अपने आप का अउर अपने परिवार का बचावै बदे नई जुगत भिड़ावत लउकत हैं। काहे से वह जानत है कि ओकर अतीत ओकर पीछा नाहीं छोड़ी अउर एक्कौ नवा खतरा ओकरे परिवार पर आवे वाला है, जेकरे बदे पहिले से ढेर चौकन्ना रहे का परी। सस्पेंस थ्रिलर के रूप मा ‘दृश्यम 3’ क ई टीजर सबहीं का खूबै पसंद आवत है अउर फैंस ई फिल्म क रिलीज क बेसब्री से जोहत हैं। फिल्म के टीजर फैंस क एक्साइटमेंट का काफी ऊंच कइ दिहे है।
कब रिलीज होई साउथ क ‘दृश्यम 3’
अगर गौर कीन जाय साउथ सुपरस्टार मोहनलाल क ‘दृश्यम 3’ क रिलीज डेट कइती तौ उ 22 मई 2026 है। हालाँकि, पहिले ई फिल्म 2 अप्रैल का रिलीज होवे वाली रही, मुला पोस्ट प्रोडक्शन क काम चले के नाते फिल्म क रिलीज डेट का आगे बढ़ाय दीन गवा है।
