दूध क इस्तेमाल लगभग घरे-घरे रोजे कीन जात है। ज्यादातर घरन मा सबेरे क सबसे पहिला काम ही होत है दूध लेइ आवे क। आप सब का बताइ दई कि 1 मई से देस क 3 राज्यन मा दूध क दाम मा बढ़ती होइ गवा है। अलग-अलग राज्यन मा मवेसी पाले वालेन का फायदा पहुँचावे बदे सहकारी दूध संघन अउर राज्य सरकारन दूध क दाम बढ़ावे (Milk prices increased) क फैसला लिहिन है।
ई राज्यन मा बढ़ि गवा दूध क दाम
दूध क दाम बढ़ावे वाले राज्यन मा ओड़िसा, केरल अउर पंजाब क नाम सामिल है। ओड़िसा राज्य सहकारी दूध उत्पादक महासंघ (OMFED) दूध खरीदे क दाम मा 1 रुपिया प्रति लीटर क बढ़ती किहिस है। OMFED अब दूध क सप्लाई करे वाले किसानन का ₹38.05 प्रति लीटर क जगह ₹39.05 प्रति लीटर क भुगतान करी।
केरल मा सहकारी दूध संघ ‘मिल्मा’ (Milma) हूँ दूध क दाम मा 4 रुपिया प्रति लीटर क बढ़ती क मंजूरी दइ दिहिस है। हालांकि, मिल्मा क बढ़ी भई दरें 1 मई से लागू नाहीं भई हैं, उम्मीद जतावा जात है कि 20 मई के बाद ई नवा दरें लागू होइहें।
पंजाब मा बढ़ि गवा दूध क दाम
उत्तर भारत क सबसे बड़ी दूध सहकारी संस्था मा सामिल ‘मिल्कफेड वेरका’ दूध खरीदे क दाम मा 20 रुपिया प्रति किलो फैट क हिसाब से बढ़ती किहिस है। सीधा-सीधा कहि जाइ त जेतने लीटर दूध मा एक किलो फैट आवत है, ओकर दाम मा 20 रुपिया क बढ़ती कीन गइ है। ज्यादातर दूध वाली कंपनियां किसानन से फैट के हिसाब से ही दूध खरीदत हैं अउर ओकरे हिसाब से पइसा चुकता करत हैं। पंजाब मा 1 मई से ई नवा दाम लागू होइ गवा है।
मवेसी पाले वालेन बदे बढ़वा गवा दाम
असल मा मवेसीन क चारा (फीड) अउर दवाई महंगी होइ जाय क कारन मवेसी पाले वालेन के डइते से लगातार दूध क दाम बढ़ावे क माँग कीन जा रही रही। अब राज्य सरकारन अउर सहकारी दूध संघन डइते से दूध क दाम मा जे बढ़ती कीन गइ है, ओसे गाँव क अर्थवेवस्था मजबूत होवे क उम्मीद है।
