नीट-यूजी परीछा मा भवा धांधली अउर पेपर लीक कय आरोप का लय कय छात्र संगठन एनएसयूआई (NSUI) आजु दिल्ली मा जम कय बिरोध परदरसन करिस। एनएसयूआई कार्यकर्ता पंचन शिक्षा मंत्रालय के बाहर जुटि कय जम कय नारेबाजी कीहिन अउर नेशनल टेस्टिंग एजेंसी (एनटीए) का ‘भ्रष्टाचार कय एजेंसी’ बतावत ओहि पर पाबंदी लगावै कय मांग कीहिन।
एनएसयूआई कय कार्यकर्ता मांग कीहिन कि एनटीए पर तुरंते पाबंदी लगावा जाय अउर शिक्षा मंत्री धर्मेंद्र प्रधान अपने पद स्यूं इस्तीफा देंय। परदरसन कय अगुवाई करि रहे एनएसयूआई कय राष्ट्रीय अध्यक्ष वरुण चौधरी कहिन कि ई करोड़ों छात्रन कय भविस्य कय सवाल अहै। उई आरोप लगाइन कि सरकार धांधली करय वालन का बचावत अहै अउर लरिकन कय मिहनत मट्टी मा मिलावत अहै।
संघर्स जारी रहै कय चेतावनी
वरुण चौधरी कहिन, ‘जब तक छात्रन का नियाव नहीं मिलि जात अउर एनटीए का बंद नहीं कीन जात, तब तक हमार ई संघर्स अइसन ही चलत रही।’ पुलिस बैरिकेड लगाय कय परदरसनकारियन का रोकय कय कोसिस कीहिस, मुला छात्र आगे बढ़य पर अड़ि रहे। एही बीच माहौल का बिगड़त देखि पुलिस कइयौ कार्यकर्ता पंचन का हिरासत मा लय लिहिस अहै। छात्र संगठन कय कहब अहै कि उई ई मुद्दा का संसद स्यूं लय कय सड़क तक उठइहैं अउर जब तक धर्मेंद्र प्रधान इस्तीफा नहीं दइ देत, तब तक चैन स्यूं नहीं बइठिहैं।
