अप्रैल कय गर्मी इतवार का सारा रिकॉर्ड तोड़ दिहिस। चंद्रशेखर आजाद कृषि एवं प्रौद्योगिक विवि कय मौसम विभाग मा मौजूद 55 साल कय आँकड़न के मुताबिक इ 26 अप्रैल का पारा सबसे ऊंच 44.1 डिग्री पर पहुंच गा। एहसे पहिले अप्रैल मा अधिकतम तापमान कबहूँ अतना नाहीं रहा। साथै-साथै गर्मी कय चरम ताप आधा घंटा पहिले ही दू बजे आइ गवा। वइसे तौ चरम ताप दुपहरिया ढाई बजे दर्ज होत है। साँझ चार बजे तक दुइ घंटा पारा 44.1 डिग्री पर ही थमा रहा। उहैं, चकेरी मा स्थित एयरफोर्स केंद्र मा अधिकतम तापमान 45 डिग्री पार कइ गवा।
सीएसए कय मौसम विभाग के नोडल अउर तकनीकी अधिकारी अजय मिश्रा बताइन कि साल 1971 से अधिकतम तापमान अतनी ऊंचाई तक अप्रैल के महीना मा कबहूँ नाहीं गवा। एहसे पहिले साल 2022 मा 29 अप्रैल का पारा 44 डिग्री तक गवा रहा। लेकिन इतवार का पारा ओहुसे ऊपर निकरि गवा। अधिकतम तापमान कय रिकॉर्ड बनवैया के साथै 26 अप्रैल कय रात कय न्यूनतम तापमान भी 19 साल के बाद सबसे जादा रहा। इतवार का न्यूनतम तापमान 25.8 डिग्री रिकॉर्ड कीन गवा। एहसे पहिले 26 अप्रैल 2007 का 26.5 डिग्री रात कय तापमान रहा। ओकरे बाद अब न्यूनतम तापमान अतना बढ़ा अहै।
चरम ताप कय पहिले आना अउर तापमान कय ओही डिग्री पर ढेर देर तक बने रहना जलवायु परिवर्तन कय असर माना जात है। उ बताइन कि 26 अप्रैल का अधिकतम तापमान सामान्य से 5.3 डिग्री अउर न्यूनतम तापमान सामान्य से तीन डिग्री जादा रहा अहै। मौसम विभाग कय अंदेशा है कि कानपुर समेत अगल-बगल कय सहरन मा 27 से 30 अप्रैल तक तेज हवा चले अउर गरज-चमक के साथ हल्का अउर मध्यम बरखा होय कय उम्मीद है।
अइसे बढ़ा पारा:
सबेरे सात बजे-36 डिग्री, आठ बजे-38 डिग्री, नौ बजे-40 डिग्री, 10 बजे-41 डिग्री, 11 बजे-42 डिग्री, 12 बजे अउर एक बजे-43 डिग्री, दू बजे से साँझ चार बजे तक 44.1 डिग्री फिर साँझ पांच बजे-42।
इन बातन कय रखव धियान:
• देह मा पानी कय कमी होय सकत है, खूबै पानी पियव।
• बिना पानी पिए घाम मा न निकरव, देह कय तापमान बढ़ सकत है।
• लू लागे अउर गर्मी लागे कय खतरा जादा है, देही का ढंके रहव।
• दुपहरिया 12 से तीन बजे तक बिना जरुरत बाहरे न निकरव।
• करिया अउर गाढ़े रंग कय कपड़ा न पहिनव, सफेद कपड़ा पहिनब नीक रही।
• सन बर्न से बचे ताईं चेहरा का कपड़ा से ढंके रहव।
