गरमी कै छुट्टी सुरु होय से ठीक एक दिन पहिले, बृहस्पतिवार कय दिन गोवा मा सेंट एंथनी हाई स्कूल म ट्रेनिंग के दौरान मूड़ म हॉकी कै गेंद लागै से १३ साल कै नौवीं क्लास कै छात्रा रुईशा खारसेल कै मौत होइ गय। ऊ उन तमाम लरिकन म से एक रही जे अगले साल कय खेल-कूद प्रतियोगिता कै तैयारी करत रहिन। स्कूल के प्रिंसिपल फादर मिलचेस्टर फर्टाडो कहिन, “सब लरिका रोजै नियर अभ्यास करत रहैं। ई हादसा स्कूल के टेम मा ही भा।”
भाई से प्रेरणा पाय के हॉकी खेलब सुरु कीन
रुईशा दू साल पहिले अपने भाई सूरज से प्रेरणा पाय के हॉकी खेलब सुरु किहे रही। सूरज पिछले महीना बिहार म भई सब-जूनियर नेशनल चैंपियनशिप म गोवा टीम कै कप्तानी किहे रहा। ट्रेनिंग के दौरान रुईशा कय गेंद लागै के बाद ऊ जमीन पर गिर परी। सूरज बताइस, “ऊ हमेसा मोरै हॉकी स्टिक इस्तेमाल करत रही। जब मोर महतारी काम पर गय रहीं, तबै उनके पास फोन आवा। हमका ओकरे मौत के बारे म तबै पता चला जब महतारी घरे पहुँची। हम तौ सुन्न होइ गयेन। हमका लागत है कि सेशन खतम होय म बस १० मिनट बचा रहा। हमका नाहीं पता कि गेंद ओका कैसे लागी अउर हमका ई भी पक्का नाहीं मालुम कि जब ऊ गिरी तौ ऊ होस मा रही कि नाहीं।”
पुलिस करत है मामले कै जाँच
एम्बुलेंस आवै म देर होइ गय, जेकरे नाते ओका एक निजी गाड़ी से तुरंतै अस्पताल लै जावा गवा। अस्पताल पहुँचै पर डॉक्टर ओका मृत घोषित कै दिहन। पुलिस ‘अप्राकृतिक मौत’ कै मामला दर्ज कै लिहिस है। पुलिस बताइस कि पोस्टमार्टम रिपोर्ट सुक्क (शुक्रवार) कय दिन आवै कै उम्मीद है।
