सुपरस्टार रजनीकांत रविवार के ऊन बातन का एकदम से नकार दिहिन, जेहमा ई कहा जात रहा कि तमिलनाडु के नवा मुख्यमंत्री विजय से ऊंका जलन होत है। चेन्नई के पोएस गार्डन मा अपने घरे पर पत्रकारन से गोठियावत रजनीकांत साफ-साफ कहिन कि हाल ही मा डीएमके अध्यक्ष एमके स्टालिन से उनकर मिलब बस एक दोस्ती के नात रहा अउर ओकरे पीछे कौनों राजनीतिक मकसद नाहीं रहा। ऊ अफवाहन के जवाब देत कहिन कि पूर्व मुख्यमंत्री स्टालिन से मिलना, विजय के मुख्यमंत्री बने के रास्ता मा रोड़ा अटकावे या पार्टीन का आपस मा जोड़ा-गांठी करे बदे नाहीं रहा।
रजनीकांत विजय के खूब बड़ाई करिन। टीवीके के संस्थापक अउर मुख्यमंत्री विजय के प्रति कौनों भी मनमुटाव से इंकार करत ‘जेलर’ स्टार रजनीकांत कहिन कि उनके अउर नवा मुख्यमंत्री के बीच मा उमर का 25 साल के बड़ा फरक है। ऊ विजय के कम उमिर मा मिलल बड़ी सफलतन के जम के तारीफ करिन। रजनीकांत कहिन कि विजय एतनी कम उमिर मा जौन हासिल करिन है, ऊ सिनेमा अउर राजनीति के दिग्गज नेता एमजीआर अउर एनटीआर के उपलब्धिन से भी कहीं ढेर है। आप का बताइ देई कि एमजीआर अउर एनटीआर अपने टेम मा तमिलनाडु अउर आंध्र प्रदेश के मुख्यमंत्री रहिन हैं।
लड़िकपन से विजय का बढ़त देखे हन
रजनीकांत पुरानी यादें साझा करत कहिन, “हम विजय का लड़िकपन से देखे हन। जउं ऊ मुख्यमंत्री बनि गये हैं, तौ हमका उनसे जलन काहे होई? ऊ सिर्फ 52 साल के उमिर मा एतने बड़े ओहदा पर पहुंच गये हैं अउर ऊ एमजीआर अउर एनटीआर से भी ज्यादा पा लीन हैं। हमका उनसे रत्ती भर भी ईर्ष्या नाहीं है।” एकरे साथे रजनीकांत विजय का उनकर ऐतिहासिक जीत पर बधाई भी दिहिन। हाल ही मा 23 अप्रैल का भवा चुनाव मा विजय के पार्टी टीवीके कांग्रेस, वीसीके, वामपंथी दल अउर आईयूएमएल के साथे मिलिके 108 सीट जीत लीन अउर बरिसन से राज कर रही डीएमके अउर एआईएडीएमके जइसन बड़ी पार्टीन का हराय के सरकार बनाई है।
चाहने वालन का सलाह
सुपरस्टार रजनीकांत बातचीत के आखिर मा ई भी साफ कर दिहिन कि ऊ खाली अपनी खराब सेहत के वजह से राजनीति मा कदम नाहीं रखिन। ऊ अपने चाहने वालन का खुलके सलाह दिहिन कि ऊ लोग अपनी मर्जी से कौनों भी राजनीतिक दल का साथ देय बदे एकदम आजाद हैं। एकरे साथे ऊ तमिलनाडु के जनता से विनती करिन कि ऊ लोग नवा मुख्यमंत्री विजय का सरकार चलावे अउर अपने आप का साबित करे बदे कम से कम दुई साल के टेम जरूर दें।
