बीजिंग मा अमेरिकी राष्ट्रपति डोनल्ड ट्रंप अउर चीन क राष्ट्रपति शी चिनफिंग के बीच भई शिखर वार्ता मा ताइवान क मुद्दा एक्ठु बड़े तनावपूर्ण बिषय क रूप मा सोझवा आवा। चीन साफै-साफ चेताउनी दिहिस कि जउं “ताइवान सवाल” का नीक जतन से नाहीं सम्भारा गवा, तौ अमेरिका अउर चीन क बीच “टकराव अउर हियां तक कि झगड़ा-लड़ाई” क स्थिति पैदा होइ सकत है। हलांकि बैठक क बाद डोनल्ड ट्रंप ताइवान पर सीधे कउनो बात कहै से बचिन अउर बातचीत का आम मुद्दन् तक ही सीमित रक्खिन। जब पत्रकारन ट्रंप से बार-बार पूँछिन कि का ताइवान क मुद्दा बातचीत मा उठा, तौ उई सवाल टालत भये कहिन, “सब बहुत नीक रहा। बढ़िया जगह अहै। चीन बहुतै सुंदर अहै।”
चीन ताइवान का बताइस सबसे संबेदनसील मुद्दा
बैठक क बाद चीन के बिदेस मंत्रालय क ओर से जारी बयान मा कहा गवा कि शी चिनफिंग ट्रंप से साफ सब्दन मा कहिन कि ताइवान प्रस्न अमेरिका-चीन संबंघन क सबसे जरूरी अउर संबेदनसील मुद्दा बना अहै। शी चिनफिंग कहिन, ‘ताइवान क आजादी’ अउर जलडमरूमध्य मा सांति आगि अउर पानी नियर एक-दूसर के उलटा अहैं। उई चेताउनी देत भये कहिन कि जउं ई मुद्दा का “नीक तरीका से नाहीं सम्भारा गवा”, तौ दूनौ देसन क बीच “टकराव अउर हियां तक कि झगड़ा-लड़ाई” होइ सकत है, जेहसे दुई-पक्छीय संबंघ गम्भीर खतरा मा पर जाइहैं।
मार्को रुबियो बोले-अमेरिका क नीति नाहीं बदली
अमेरिकी बिदेस मंत्री मार्को रुबियो भी चीन क चेताउनी पर सीधा जवाब देइ से बचिन अउर कहिन कि ताइवान का लयके अमेरिका क नीति मा कउनो बदलाव नाहीं भवा अहै। NBC News से बातचीत मा रुबियो कहिन, ताइवान क मुद्दा पर अमेरिका क नीति आज भी उहै अहै जउन पहिले रही। चीन हर बखत ई मुद्दा उठावत है, हम अपनी बात साफ करत अही अउर फिर दूसर बिषयन पर आगू बढ़ि जात अही। हलांकि उई चीन का चेताउनी देत भये कहिन कि जउं बीजिंग ताइवान पर जोर-जबस्ती करै क कोसिस करी, तौ ई बहुत बड़ी गलती होइ।
अमेरिका-चीन रिसतन मा फिर बढ़ा तनाव
ताइवान बहुतै दिनन से अमेरिका अउर चीन क बीच सबसे संबेदनसील विवादन् मा सामिल रहा अहै। चीन ताइवान का आपन हिस्सा मानत है अउर जरूरत परै पर जोर-जबस्ती से ओका अपने कब्जा मा लेइ क बात कहि चुका है। वंही अमेरिका सरकारी तौर पर “वन चाइना पॉलिसी” मानत है, मुला ताइवान का रच्छा खातिर मदद भी देत रहत है।
