पछिले मैच मा रॉयल चैलेंजर्स बेंगलुरु के खिलाफ खाली 75 रन पर सिमटे वाली दिल्ली कैपिटल्स सुकरवार का जबरदस्त वापसी कीहिस। राजस्थान रॉयल्स के घरे मां घुस के दिल्ली निक के हल्ला बोलिस। पथुम निसंका (62) अउर केएल राहुल (75) कय दमदार पारियों के बदौलत दिल्ली राजस्थान का सात विकेट से हराय के फिर से जीत कय पटरी पर लौटि आई अउर एक नया रिकॉर्ड बनाय दीहिस। दुनौ बल्लेबाज पहिले विकेट बरे शतकीय साझेदारी कय के टीम का निक शुरुआत दियाइन।
जयपुर कय सवाई मानसिंह स्टेडियम मा खेले गये ई मैच मा राजस्थान पहिले बल्लेबाजी करत भए छह विकेट खोय के 225 रन बनाय रहा। दिल्ली ई बड़े लक्ष्य का 19.1 ओवर मा खाली तीन विकेट खोय के हासिल कइ लिहिस।
बनाय डालेन बड़ा रिकॉर्ड
यही के साथे दिल्ली अपने नावें एक बड़ा रिकॉर्ड कइ लिहिस अहै। ई आईपीएल इतिहास मा दिल्ली कय अब तक कय सबसे बड़ा रन चेज (लक्ष्य का पीछा करब) अहै। एसे पहिले दिल्ली विशाखापट्टनम मा लखनऊ सुपर जायंट्स के खिलाफ 210 रन कय लक्ष्य हासिल कीहिस रहा। साल 2017 मा ऊ गुजरात लायंस के खिलाफ 209 रन चेज करे रहा। पछिले सीजन मा भी ई टीम पंजाब किंग्स के खिलाफ 207 रन कय लक्ष्य पार कीहिस रहा।
राजस्थान के नावें भी जुड़ गा रिकॉर्ड
ई मैच मा खाली दिल्ली कय नावें ही रिकॉर्ड नाहीं बना। राजस्थान भी कुछ अइसन रिकॉर्ड अपने नावें कीहिस अहै जउन कौनों टीम नाहीं चाहत। ई राजस्थान के खिलाफ आईपीएल इतिहास कय दूसरा सबसे बड़ा चेज अहै। ई मामला मा पहिले नंबर पर सनराइजर्स हैदराबाद कय टीम अहै जउन राजस्थान के खिलाफ एही सीजन मा एही मैदान पर 229 रन कय लक्ष्य हासिल कीहिस रहा। राजस्थान का अपना घर अब रास नाहीं आइ रहा अहै। साल 2025 से ऊियां सात मैच खेले अहैं जउनमा से छह मा ओका हार कय मुंह देखै का पड़ा अहै।
