दिल्ली-NCR अउर राजस्थान-MP मा आँधी-पानी कय साथै, कइयौ सहरन मा पारा 44°C के पार पहुँचा। बीतल दिन सनीचर का देस के जादातर हिस्सन मा आँधी कय साथै बरखा भीषण गरमी से राहत देय क काम कीन। दिल्ली-एनसीआर अउर उत्तर प्रदेश-उत्तराखंड से लईके मध्य प्रदेश राजस्थान तक तेज हवा कय साथै बरखा भई। कइयौ जगह तौ ओलो गिरें। वंही देस के कइयौ सहरन मा लू (हीटवेव) कय स्थिति बनी रही।
राजस्थान के जयपुर, बीकानेर अउर जोधपुर समेत कइयौ सहरन मा आँधी चली अउर पारा 40 डिग्री सेल्सियस से नीचे आई गवा। उत्तराखंड के देहरादून मा ओला गिरें। उत्तरकाशी मा मुख्यमंत्री पुष्कर सिंह धामी कय हेलिकॉप्टर ओलावृष्टि कय बीचै लैंड कीन।
कौन-कौन सहरन मा रही लू कय स्थिति?
देस के कइयौ सहरन मा अबहूँ लू कय स्थिति बनी अहै। सनीचर का महाराष्ट्र अउर राजस्थान के 4 सहरन मा तापमान 44 डिग्री सेल्सियस के पार रहा। महाराष्ट्र कय वर्धा 44.5 डिग्री सेल्सियस तापमान कय साथ देस मा सबसे गरम रहा। चंद्रपुर मा पारा 44.4 डिग्री सेल्सियस रहा। राजस्थान के जैसलमेर मा 44.4 डिग्री सेल्सियस अउर बाड़मेर मा 44.3 डिग्री सेल्सियस तापमान दर्ज कीन गवा। छत्तीसगढ़ के धमतरी मा सड़कन पर पानी कय फुहार छोड़िन गईं।
अगले दुइ दिनन तक कइसन रही मौसम?
मौसम बिभाग 4 मई का जम्मू-कश्मीर, पंजाब, हरियाणा, दिल्ली, चंडीगढ़, हिमाचल, उत्तराखंड, मध्य प्रदेश, छत्तीसगढ़, बिहार, झारखंड, ओडिशा, आंध्र प्रदेश अउर केरलम मा बरखा कय संभावना जताय अहै। वंही, बंगाल, असम, मेघालय अउर सिक्किम मा भारी बरखा कय ऑरेंज अलर्ट अहै। पच्छिमी राजस्थान मा लू कय अलर्ट जारी अहै। तमिलनाडु-पुडुचेरी मा उमस भरल मौसम रही।
वंही, 5 मई का मध्य प्रदेश, छत्तीसगढ़, ओडिशा, बिहार, झारखंड, बंगाल, दक्खिन कर्नाटक मा आँधी-पानी कय यलो अलर्ट अहै। राजस्थान मा लू चली। साथै आँधी-पानी कय भी अलर्ट अहै। सिक्किम, असम, मेघालय, अरुणाचल, नगालैंड, मणिपुर, मिजोरम, त्रिपुरा, तमिलनाडु अउर केरलम मा भारी से बहुत भारी बरखा कय अनुमान अहै।
