नोएडा इंटरनेशनल एयरपोर्ट सुक्कवार का अधिकारिक तौर पर बताइस है कि हियाँ से 15 जून 2026 से कमर्शियल जहाज उड़ै लगिहें। पहिली कमर्शियल फ्लाइट इंडिगो कंपनी के होइ। ओकरे तुरंतै बाद अकासा एयर अउर एयर इंडिया एक्सप्रेस भी अपनी सेवा सुरू कइ दिहें। करीब 70 फ्लाइटन के प्रस्ताव पहिले ही मिल चुके अहिन, यही नाते एयरपोर्ट मैनेजमेंट कहत है कि जून के आधा बीतत-बीतत जहाज उड़े लगिहें।
यीडा अउर नोएडा इंटरनेशनल एयरपोर्ट लिमिटेड (नायल) के सीईओ राकेश कुमार सिंह के कहब है कि नोएडा इंटरनेशनल एयरपोर्ट पर कमर्शियल सेवा सुरू होइ सकैं, ओकरे खातिर यीडा अउर नायल के स्तर पर हर मुमकिन कोसिस कीन जात है। एयरपोर्ट से जहाज उड़ावै खातिर अभी तक करीब 70 प्रस्ताव मिल चुके अहिन। एसे करीब-करीब सब बड़े सहरन खातिर हियाँ से उड़ान सुरू होइ। इंडिगो के अलावा अकासा एयर अउर एयर इंडिया एक्सप्रेसवे के भी प्रस्ताव ई उड़न खातिर सामिल अहिन। जल्दीयै हियाँ से जहाज उड़े लगिहें।
सुरू मां उड़िहें 17 फ्लाइट्स
एयरलाइंस कंपनियन ने सुरू मां एयरपोर्ट से 17 फ्लाइट सुरू करै के प्रस्ताव राखा है। मंजूरी मिलै के बाद अब टिकट बुकिंग सुरू करै के प्रक्रिया का भी आखिरी रूप दियै के निर्देश दइ दीन गयें।
28 मार्च का प्रधानमंत्री कइ चुके अहिन उद्घाटन
बीते 28 मार्च का प्रधानमंत्री नरेंद्र मोदी जी के हाथन उद्घाटन होइ चुका है। हियाँ घरेलू अउर कार्गो टर्मिनल बनके तैयार है। पहिले चरन मां एयरपोर्ट 1334 हेक्टेयर मां पूरा कीन गवा है। एमां 3900 मीटर लम्बी पहिली रनवे, यात्री टर्मिनल, एटीसी अउर कार्गो हब सामिल है।
सरकार के झोरी मां आइ खूब पइसा
नोएडा इंटरनेशनल एयरपोर्ट यात्रिन का दुनिया भर के नीक सुबिधा दियै के साथै-साथै सरकार के कमाई के बड़हन जरिया बनै जात है। नोएडा इंटरनेशनल एयरपोर्ट लिमिटेड (नायल) का हर सवारी पर लगभग 496 रुपय के कमाई होइ। अंदाज़ा है कि अगले 30 साल मां ई एयरपोर्ट से कुल कमाई एक लाख करोड़ रुपय तक पहुंचि सकत है। एयरपोर्ट बनै के नाते आस-पास के इलाकन मां जमीन के मांग बहुतै तेजी से बढ़ी है।
नीक नतिजा सामने आए
यीडा के सीईओ आरके सिंह बताइन कि नोएडा इंटरनेशनल एयरपोर्ट के साथै यमुना सिटी इलाका के विकास बहुत तेज भवा है। जे लोग खाली जमीन ले लिहिन रहे अउर काम नाहीं करत रहे, उन पर कड़ाई करै के बहुत नीक नतिजा निकरा है। दुनिया भर के सुबिधान से लैस ई एयरपोर्ट साल 2060-61 तक एक लाख करोड़ रुपय के कमाई वाला केंद्र बनि जाई।
