अब एक्कै बार फिरि स सबके मुंह स ‘ऑल इज वेल’ निकरी, काहे स बॉलीवुड क परफेक्शनिस्ट आमिर खान हिंदी सिनेमा क पहिली 200 करोड़ कमाय वाली फिल्म क सीक्वल पर मुहर लगाइ दिहिन अहैं। आमिर ‘थ्री-इडियट्स’ क सीक्वल कन्फर्म करत भवा बताइन अहैं कि ई बार फिल्म क कहानी कइसे आगू बढ़ी अउर एहमा केतने साल क लीप आई। ब्लॉकबस्टर फिल्म क स्टारकास्ट क लैके भी एक्टर खुलासा किहिन अहै।
थ्री-इडियट्स क कहानी मा आई बड़ा लीप
पिछिले कई महीनन स बॉलीवुड क गलियारा स ई खबरि आवत रही कि आमिर खान ‘थ्री-इडियट्स’ क सीक्वल लइके आवत अहैं। अब खुदै एक लीडिंग पोर्टल स बात-चीत क दौरान एक्टर एकरे सीक्वल क प्रोग्रेस पर बात किहिन अहै। आमिर कहेन, “ई समइ मा मैं थ्री-इडियट्स 2 पर काम करत हौं। मैं नरेशन सुनेउँ अउर मोहका नीक लाग। अबही भी स्क्रिप्ट पर काफी काम होब बाकी अहै, मुला कहानी बहुतै नीक अहै। फिल्म मा ह्यूमर भी होई अउर एक अनोखी कहानी भी देखइ क मिली। ई 3 इडियट्स क स्टोरी जइसन ही होई, मुला एहमा 10 साल बाद क कहानी देखावा जाई।”
आमिर खान फिल्म मा निभईहैं ई किरदार
आमिर खान ‘थ्री-इडियट्स’ क सीक्वल पर बात-चीत करत ई हिंट भी दइ दिहिन कि उ फिल्म मा एक्कै बार फिरि स फुंसुक वांगडू क किरदार निभावत दिखाई दइहैं। उ कहेन, “ई उन फिल्मन मा स एक अहै, जेहपर मैं जल्दीये काम शुरू करब। ई एक बहुतै सुंदर कहानी अहै, जेहका अभिजात अउर राजू मिलिके लिखे अहैं। तौ मोहका एकर बेसब्री स इंतजार अहै।”
हालांकि, ई कल्ट फिल्म क सीक्वल क शूटिंग आमिर खान कब शुरू करिहैं, एहपर जादा जानकारी तौ उ नाहीं दिहिन, मुला खबरिन क मानै तौ थ्री-इडियट्स क सीक्वल क ताईं आमिर खान, आर माधवन, शर्मन जोशी अउर करीना कपूर एक्कै बार फिरि स साथे आवत अहैं। आप सबन का बताइ दी कि थ्री इडियट्स साल 2009 मा रिलीज भइ रही; ई 200 करोड़ क क्लब मा सामिल होय वाली सबसे तेज फिल्म रही। ई फिल्म भारत मा 4 दिन क भीतरै 100 करोड़ क कलेक्शन कइ लिहे रही।
