पायलटन क मउत से हड़कंप मचि गवा है। एयरलाइन पायलट्स एसोसिएशन ऑफ इंडिया (ALPA) सुकवार का नागरिक उड्डयन महानिदेशालय (DGCA) का चिट्ठी लिखिके अदालत की ओर से तय कय गय उड़ान ड्यूटी समय सीमा का लागू करय मा होत देरी पर गहरा चिंता जताइस है। पछिले दिना दुइ पायलटन क मउत के बाद पायलट संघ DGCA का ई चिट्ठी लिखे अहय।
बतावा जात है कि पछिले दुइ दिना मा एअर इंडिया अउर अकासा एयर के दुइ पायलटन का दिल क दौरा पड़ा रहा। दूनों ड्यूटी पर नाहीं रहे। एअर इंडिया वाले पायलट की मउत बाली मा आराम कय दौरान भई, जबकि अकासा एयर के पायलट क मउत ट्रेनिंग के दौरान होइ गय। अपनी चिट्ठी मा पायलट संघ कहेस है कि ई हफ्ता भई पायलटन क मउत का देखत भए उड़ान सुरक्षा अउर क्रू मेंबर्स के भलाई का लेके भारी चिंता बा।
ई सब मामला फ्लाइट ड्यूटी टाइम लिमिटेशन (FDTL) का बार-बार टालय के नाते खड़ा भवा है, जबकि इही मुद्दा पर पहिलेउ कई बार एतराज जतावा जा चुका है। एसोसिएशन का कहब है कि आपरेटरन का लगातार छूट दिय जाय से FDTL नियमन क असली मकसद काफी हद तक कमजोर होइ गवा है। ई छूट अब एक तरीका से नियमै बन गय है, जबकि सुरु मा एका थोड़े दिन क उपाय बतावा गवा रहा।
पायलट संघ के मुताबिक, इका नाते पायलटन क थकान दूर करय क मकसद पूरा नाहीं होइ पावत है। इते से बिना कउनो पुख्ता सुरक्षा इंतजाम अउर नियमन के दायरे मा शेड्यूलिंग का बढ़ावा मिलत है। अपनी चिट्ठी मा एसोसिएशन DGCA से ई बदलाव का धीरे-धीरे वापस लेय अउर जरूरी कदम उठावय क अरजी कीहिस है।
