वेल्स मा पेमब्रोक कैसल के नीचे बनी वोगन कैवर्न के जाँच करत पुरतत्वविदन (Archaeologists) का कहब है कि ई जगह ब्रिटेन के सबसे खास प्रागैतिहासिक खोज मा से एक होइ सकत है। 11वीं सदी के ई किला के नीचे छिपी गुफा मा एक लाख साल से भी ढेर पुरान मनइन अउर जानवरन के चहल-पहल के सबूत मिलिन हैं। शोध करइ वालन का हुंवा पत्थर के औजारन के साथे-साथे मैमथ, ऊनी गैंडा अउर दरियाई घोड़ा के हड्डिन मिली हैं। ई जानवर कबहूँ पुराने ब्रिटेन मा घूमत-फिरत रहें।
एबरडीन विश्वविद्यालय के जानकाइन का मानब है कि ई गुफा मा निएंडरथल अउर शुरूआती होमो सेपियंस के निसान भी होइ सकत हैं, जेसे ब्रिटेन के पुराने इतिहास के बारे मा बड़ कीमती जानकारी मिली। ई गुफा पेमब्रोक कैसल के ठीक नीचे है, जउन राजा हेनरी VII के जन्म के जगह भी आय। गुफा तक जाय बरे किला के भीतर से एक घुमावदार सीढ़ी बनी है। ई करीब 23 मीटर लंबी अउर 10 मीटर ऊँच है।
कइयौ सालन तक पुरतत्वविदन का ई लागत रहा कि ई जगह के कउनो वैज्ञानिक महत्व नाहीं है, काहे से कि विक्टोरियन काल के खुदाई मा सब कुछ नास होइ गवा होइ। मुलुक अबै के आधुनिक खुदाई से पता चला है कि जमीन के नीचे पुरान अवशेष अबहूँ सुरक्षित हैं। हिंया दरियाई घोड़ा के अवशेष मिलब बड़ महत्व के बात है काहे से कि ई लगभग 1,20,000 साल पुरान होइ सकत हैं। ओही बखत ब्रिटेन के मौसम आज के तुलना मा बहुत गर्म रहा, जेकरे वजह से वेल्स जइसन इलाकन मा भी अइसन बड़े जानवर रहि सकत रहें।
