भारत तूरिस पाकिस्तान क न्यूक्लियर ब्लैकमेल क डर, चार दिनन तक दिहिस करारा जवाब

भारत अउर पाकिस्तान के बीच माँ बहुतै पुरान खींचातानी चली आवत है। दुनहु देसन के बीच कय्यू दफे लड़ाई होइ चुकी है, जेहमा पाकिस्तान का हमेशा मुँह की खानी पड़ी है। इहै मारे पाकिस्तान हारय के बाद चुपके-चुपके आतंकवादिहन क मदद करत रहत है। पहलगाम हमला के बाद भारत ‘ऑपरेशन सिंदूर’ के जरिये आतंकवाद के खिलाफ ‘जीरो टॉलरेंस’ क संदेसा दई दिहिस। ई ऑपरेशन का एक साल पूरा होय पर आवव एक नजर डारित है कि का-का भा रहा…

22 अप्रैल 2025 का कश्मीर के पहलगाम मा आतंकवादिहन हमला कीन। पाकिस्तान क सह पाय वाले आतंकी संगठन TRF के गुंडहन पर्यटक इलाका मा 26 आम मनइन का मार डारिन। ई हमला मा उ पचे मनइन का धरम के आधार पर अलगा-अलगा कइकै निशाना बनाइन। सुरक्षा बल तुरंते इलाका का घेरि लिन अउर खोज-बीन (सर्च ऑपरेशन) शुरू कइ दीन।

PM मोदी कड़ा रुख अख्तियार कीन

ई हमला के बाद प्रधानमंत्री नरेंद्र मोदी बहुतै कड़ा रुख देखाइन। उ कहेन कि भारत हर आतंकी अउर उनके आका का ढूँढ़-ढूँढ़ क सजा देई। भारत पाकिस्तान के साथ राजनयिक संबध कम कइ दिहिस, ‘इंडस वाटर ट्रीटी’ (सिंधु जल समझौता) रोक दिहिस, सरहद बंद कइ दिहिस अउर पाकिस्तानी राजनयिकों का देस से निकारि दिहिस। दुनहु देसन के बीच तनाव बहुतै बढ़ि गवा।

ऑपरेशन सिंदूर मा 9 आतंकी ठिकानन पर हमला

7 मई का भारत ‘ऑपरेशन सिंदूर’ शुरू कीन। भारतीय सेना, वायुसेना अउर नौसेना मिलिकै पाकिस्तान अउर पाकिस्तान अधिकृत कश्मीर (PoK) मा 9 आतंकी ठिकानन पर हमला बोलिन। इहमा लश्कर-ए-तैयबा, जैश-ए-मोहम्मद अउर हिजबुल मुजाहिदीन के बड़े-बड़े कैंप सामिल रहे। ई कार्रवाई भारतीय धरती से कीन गई। रक्षा मंत्री राजनाथ सिंह बताइन कि ई ऑपरेशन मा करीब 100 से ढेर आतंकी मार गिरावा गयें।

PM मोदी सेना का दीन पूरी छूट

प्रधानमंत्री मोदी सेना का पूरा अधिकार देते हुए कहेन कि जउं पाकिस्तान एकौ गोली चलायी, त भारत अउरौ तेज जवाब देई। ई घटना से दुनहु परमाणु ताकत वाले देसन के बीच फिर से बड़की लड़ाई क नौबत आइ गई। एक ऑपरेशन मा परमाणु संपन्न देस के आतंकी ठिकानन पर हमला कइकै भारत डर का खतम कइ दिहिस। आतंकी ठिकानन का चुनाव बहुतै सोच-समझ क कीन गवा रहा, जेहसे ढेर से ढेर आतंकी मरें अउर कम से कम आम मनइन क नुकसान होय।

अमेरिकी उपराष्ट्रपति PM मोदी से बतियाइन

‘ऑपरेशन सिंदूर’ के बाद अमेरिका के उपराष्ट्रपति जेडी वॉन्स 9 मई का प्रधानमंत्री मोदी से बात कीन अउर बताइन कि पाकिस्तान जंग का पूरी लड़ाई मा बदले क तैयारी करत है। भारत ई बात का गंभीरता से लिन, मुला झुके से मना कइ दिहिस। प्रधानमंत्री मोदी साफ कहि दिहिन कि भारत कउनो ‘न्यूक्लियर ब्लैकमेल’ बर्दास्त नाहीं करी अउर आतंकवाद क सहारा देय वाले पाकिस्तान का बहुतै करारा अउर बिनासकारी जवाब देई।

पाकिस्तान क जवाब

अगिले दिन पाकिस्तान ‘लाइन ऑफ कंट्रोल’ (LoC) पर ड्रोन हमला अउर भारी गोलीबारी शुरू कइ दिहिस। उ भारत के कय्यू फौजी ठिकानन पर 300-400 ड्रोन दागेस, जेहमा 16 आम मनई मारे गए। हालाँकि भारतीय वायु रक्षा प्रणाली (खासकर S-400) ज्यादातर हमलन का बेकार कइ दिहिस। भारत जवाब मा लाहौर मा चीन के बनावल ‘HQ-9 मिसाइल सिस्टम’ का तबाह कइ दिहिस।

चार दिन के बाद ‘सीजफायर’ पर बनी बात

चार दिन के खूँख्वार लड़ाई के बाद दुनहु देसन के DGMO के बीच समझौता होइ गवा। 10 मई का संझा 5 बजे से सारी गोलीबारी अउर फौजी कार्रवाई बंद कइ दी गई। ई बीच भारतीय सेना पाकिस्तान का बहुतै नुकसान पहुँचाई। अब दुनहु देस फिर से तनाव अउर डांवाडोल सांति वाले दौर मा पहुँचि गए हें, मुला आगू के संकट मा भारत क मजबूत स्थिति साफ़ देखाति है।