मध्य प्रदेश मा मई क गरमी अबै डरावना स्तर तक पहुँचत लखायत है। प्रदेश के कई सहरन मा तापमान 45 डिग्री के मेर पहुंचि गवा है। सुकवार का 12 सहरन क पारा 43 डिग्री से ऊपर दर्ज कीन गवा। सबसे जादे गरम खंडवा रहा, जहाँ तापमान 45.1 डिग्री रिकॉर्ड कीन गवा। मौसम बिभाग सनिच्चर का प्रदेश के 37 जिला मा लू (हीटवेव) क अलर्ट जारी करे है। इंदौर, उज्जैन, रतलाम, धार अउर देवास मा तेज लू के बरे ऑरेंज अलर्ट घोसित कीन गवा है। वहीं कई जिला मा दिन के साथे-साथै रातियो तपिहैं। इंदौर, उज्जैन अउर मंडला मा ‘वॉर्म नाइट’ (गरम रात) क स्थिति रही, मतलब रात मा भी गरमी से चैन नाहीं मिली।
ई जिला मा चली लू
भोपाल, ग्वालियर, मुरैना, भिंड, दतिया, शिवपुरी, गुना, विदिशा, रायसेन, नर्मदापुरम, हरदा, बुरहानपुर, खरगोन, बड़वानी, सीहोर, राजगढ़, मंदसौर, नीमच, झाबुआ, छतरपुर, सागर, दमोह समेत कई जिला मा लू क असर रही। मौसम बिभाग के हिसाब से इन इलाकन मा दुपहरी के बखत हाल अउर खराब होइ सकत है।
कत्तौ लू तौ कत्तौ ओरा
प्रदेश मा मौसम क मिजाज बिल्कुल बदल गवा लखायत है। एक कइती कई जिला भयंकर गरमी से झुलसत हैं, तौ दूसरे कइती कुछ इलाकन मा आँधी, पानी अउर ओरा (ओलावृष्टि) भी परे। कटनी मा तेज हवा के साथे ओरा गिरे, जबकि उमरिया मा आँधी अउर पानी से खरीदी केंद्रन मा धरा गेंहूँ भीजि गवा। सागर, जबलपुर, छिंदवाड़ा, गुना, शिवपुरी अउर रायसेन समेत कई जिला मा साँझ का मौसम बदलि गवा।
बड़े सहरन क तापमान
खंडवा – 45.1 डिग्री
शाजापुर -44.6 डिग्री
खरगोन – 44.2 डिग्री
रतलाम – 44 डिग्री
भोपाल – 42.8 डिग्री
उज्जैन – 42.5 डिग्री
इंदौर – 41.8 डिग्री
जबलपुर – 41.8 डिग्री
ग्वालियर – 40.9 डिग्री
अगाऊ 4 दिन तक राहत नाहीं
मौसम बिग्यानी एचएस पांडे के मुताबिक 16 से 19 मई तक प्रदेश के जादेतर हिस्सन मा भयंकर गरमी बनी रही। दुपहरी 12 से 3 बजे के बीच मा लू क असर सबसे जादे रही। मनइन का बहुत जरूरी होय पर ही घर से बाहरे निकरे क सलाह दीन गयी है। मजे क बात ई है कि मई के जादेतर दिनन मा प्रदेश मा आँधी-पानी अउर ओरा क असर रहा। 15 दिनन मा 13 दिन मौसम बदल रहा, लकिन अब अचानक तेज गरमी हालत बिगाड़ दिहिस है। फिलहाल सनिच्चर का पानी बरसे क कौनों उम्मीद नाहीं जतायी गयी है।
मौसम बिभाग क सलाह (एडवाइजरी)
दिन भर खूब पानी पियत रहैं
जादे देर तक घाम मा न रहें
हल्के रंग के सूती कपड़ा पहिरें
लरिका अउर बुढ़वा मनई खास सावधानी बरतें
दुपहरी 12 से 3 बजे के बीच बाहरे निकरे से बचें
