मुख्यमंत्री योगी आदित्यनाथ खराब मौसम मा आम जनता का तुरन्तै मदद पहुँचावे का निर्देश दीन हैं। उहइ कहिन कि आंधी-पानी के कारण किसानन अउर मनईन का भारी दिक्कत के सामना करे का पड़त है। ई कोशिश कीन जाय कि खराब मौसम का असर कम से कम होय। मुख्यमंत्री योगी आदित्यनाथ सोमवार की सुबह लखनऊ समेत प्रदेश के कइयउ जिला मा भई आंधी-पानी अउर खराब मौसम का देखत भये मनईन का होय वाली परेशानी के बारे मा प्रशासन का हुकुम दीन हैं।
सीएम कहिन कि मौसम से प्रभावित जिला के जिलाधिकारी अउर पूरा सरकारी अमला मुस्तैद रहै। हर हाल मा ई पक्का कीन जाय कि खराब मौसम का कम से कम असर परै। जान-माल के नुकसान, मवेसिन के नुकसान, घायल अउर आपदा प्रभावितन का 24 घंटा के भीतर मुआवजा दियावा जाय। एहमा कउनो भी तरह के लापरवाही नहीं होनी चही। सीएम योगी कहिन कि सरकार हर मुश्किल घड़ी मा किसानन अउर सब प्रदेशवासिन के साथै मजबूती से ठाढ़ है।
अफसरन का अलर्ट मोड पर रहय का निर्देश देत मुख्यमंत्री कहिन कि खराब मौसम मा कइयउ जिला मा सड़क हादसा भये हैं। हुंवा राहत-बचाव के काम तेज गति से कीन जाय। घायलन का नगिचे के अस्पतालन मा तुरन्तै इलाज मिलय, ई पक्का कीन जाय। मुख्यमंत्री कहिन कि आंधी-पानी से किसानन अउर आम जनता का काफी परेशानी होय रही है, एहसे खराब मौसम का कम से कम असर होय, अइसन कोशिश कीन जाय।
मुख्यमंत्री सब जिलाधिकारिन का निर्देश दीन कि वे लगातार फील्ड मा रहैं अउर असली स्थिति का जायजा लेत रहैं। फील्ड के अधिकारी भी खराब मौसम से प्रभावित इलाकन मा मनईन के बीच जायं, उनसे सीधा बात करें अउर राहत काम मा तालमेल बनायें। कउनो भी विपरीत स्थिति या जरूरत पर सब जानकारी टेम से बटोर के शासन का भेजी जाय, ताकि प्रभावित मनईन का जल्दी से जल्दी राहत पक्का कीन जा सकै।
