यूक्रेन रूस पे जुद्धबंदी क मान न रखै क आरोप लगायस है। कहिस है कि ऊ मंगल-बुध के आधी रात से जुद्ध रोकै क एलान करे रहा, मने रूस दनादन ड्रोन हमला कइके ओका तोड़ दिहिस। हुंए रूस कहत है कि यूक्रेन जुद्धबंदी क एलान कइके खुदै ओका तोड़ दिहिस। रूस के इलाका मा यूक्रेन क छोड़े 53 ड्रोन मार गिरावा गयें।
यूक्रेन रूस के कब्जा वाले क्रीमिया अउर काला सागर वाले इलाका मा ड्रोन हमला किहिस रहा। क्रीमिया के झानकोई सहर मा यूक्रेन के ड्रोन हमला से पांच मनई मारि डारे गयें। यूक्रेन के एकतरफा जुद्धबंदी वाले एलान पे रूस अभी तक कौनों साफ बात नाय कहेस है। ईसे फरवरी 2022 से चलत ई जुद्ध के खतम होय क उमेद अब धुंधलाय लागी है।
मंगल के दिन रूस के ड्रोन अउर मिसाइल हमला मा यूक्रेन मा 27 मनई मरि गयें अउर 120 घायल भयें। बुध के दिन रूस ड्रोन हमला से सूमी सहर के लड़कन के एक स्कूल का निशाना बनायस। ई हमला मा एक सुरक्षाकर्मी मारा गा अउर दुइ जने घायल होइ गयें। हमला के टेम स्कूल मा कौनों लइका नाय रहा।
यूक्रेन के राष्ट्रपति वोलोदिमीर जेलेंस्की कहेन हैं कि रूसी सेना यूक्रेनी सहरन पे बराबर हमला करत है अउर जुद्ध के मैदान मा गोला दाग रही है। ईसे ई बात साफ होत है कि रूस जुद्ध रोकै अउर मासूम मनइन क जान बचाव मा कौनों रुचि नाय लेत है। जेलेंस्की मास्को से गोहार लगायेन हैं कि ऊ यूक्रेन पे हमला बंद करै अउर रूस बात-बात मा शांति क रास्ता खोजै।
बतावा जात है कि यूक्रेन के तगड़ा मुकाबला करै के बादौ रूसी सेना धीरे-धीरे यूक्रेनी इलाकन मा बढ़त जात है। दूसर महाजुद्ध मा नाजी जर्मनी पे सोवियत संघ के जीत क 81 वीं बरसी के मौके पे रूस सुकर-सनीचर का लड़ाई बंद रखै क बात कहे रहा। लेकिन यूक्रेन मंगल-बुध के आधी रात से जुद्धबंदी क एलान कइ दिहिस। अब रूस के तरफ से हमला जारी रहै पे जेलेंस्की बदला लेवै के चेतौनी दिहिन हैं।
