मुख्यमंत्री अभ्युदय योजना के तहत नौनी-लइकन का प्रतियोगी परीछन खातिर मिलै वाली फ्री कोचिंग के आवेदन सुरू होइ गवा हैं। ई दाईं ऑफलाइन अउर ऑनलाइन दुइनौ तरीका से आवेदन कीन जा सकत है। आवेदन करै क आखिरी तारीख 31 मई तय कीन गयी है। 1 जुलाई से क्लासन क संचालन सुरू होइ जाई।
जिला समाज कल्याण अधिकारी विजय लक्ष्मी मौर्या बताइन कि मुख्यमंत्री अभ्युदय योजना के तहत सिविल सर्विसेज अउर दूसर प्रतियोगी परीछन के पढ़ाई वाले सत्र 2026-27 खातिर नया लइकन से आवेदन माँगा गवा है, जउन 8 मई से 31 मई तक लीन जइहें। प्रवेश परीछा 5 से 15 जून 2026 के बीच कराये जाइ क संभावना है। परीछा क नतीजा, काउंसलिंग अउर मेरिट के आधार पर रजिस्ट्रेशन 20 से 25 जून 2026 तक होई। कोचिंग क नया सत्र एक जुलाई से सुरू होइ जाई।
कौन-कौन भरि सकत है फॉर्म?
सिविल सेवा, पीसीएस अउर एसएससी जइसन एक दिनी परीछन खातिर ग्रेजुएशन के आखिरी साल मा पढ़ै वाले या पास होइ चुके छात्र पात्र होइहें। एनडीए अउर सीडीएस खातिर परीछा के नियम के हिसाब से पढ़ाई-लिखाई क योग्यता होब जरूरी है। नीट अउर जेईई खातिर कक्षा 11 अउर 12 मा पढ़ै वाले या पास होइ चुके विज्ञान साइड के छात्र आवेदन करि सकत हैं।
कइसे करीं आवेदन?
जउन लइका ई योजना क लाभ लेबै चाहत हैं, ऊ अभ्युदय पोर्टल Abhyudayup.in के जरिए ऑनलाइन आवेदन करि सकत हैं। एकरे अलावा, ऑफलाइन आवेदन फॉर्म डॉ. भीमराव आंबेडकर के खंदारी परिसर मा बनल आईएएस अउर पीसीएस परीछा ट्रेनिंग सेंटर मा सुबह 10 बजे से सांझ 5 बजे तक जमा कीन जा सकत है। जादे जानकारी खातिर लइका मोबाइल नंबर 9458229850 अउर 7985478963 पर फोन करि सकत हैं।
आवेदन खातिर जरूरी कागजात
फॉर्म भरै खातिर लइकन का दुई फोटो, आधार कार्ड, पढ़ाई-लिखाई क सर्टिफिकेट जइसन कि हाईस्कूल, इंटरमीडिएट अउर ग्रेजुएशन क अपने से साइन कीन भई फोटोकॉपी (स्वप्रमाणित छायाप्रति) साथै लगावै क होई।
