राज करै आवत अहैं ‘राजा शिवाजी’, एडवांस बुकिंग शुरू होइ गय

हिंदी अउर मराठी सिनेमा के मशहूर अभिनेता रितेश देशमुख का भला कउन नाहीं जानत। रितेश की आवै वाली फिलिम के नाव ‘राजा शिवाजी’ आय, जेका मराठी फिलिम इंडस्ट्री कइत से जल्दीय सिनेमाघरन मा रिलीज कीन जाइ। रिलीज से पहिले रितेश देशमुख के ‘राजा शिवाजी’ के एडवांस बुकिंग शुरू होइ गय अहै। ई पीरियड ड्रामा फिलिम का लय कइ अइसन कयास लगावा जात अहै कि बॉक्स ऑफिस पर ‘राजा शिवाजी’ राज करी अउर कमाई के मामला मा धमाकेदार प्रदर्शन करत देखाय परी।

शुरू भवा ‘राजा शिवाजी’ के एडवांस बुकिंग

रितेश देशमुख के ‘राजा शिवाजी’ फिलिम के नाव बहुतै दिनन से चरचा के बिषय बना अहै। एह मल्टी-स्टारर फिलिम मा रितेश खाली एक्टर नाहीं अहइँ, बल्कि निर्देशन क जिम्मेदारी भी सम्हारत अहइँ। हालै मा मराठी फिलिम ‘राजा शिवाजी’ के नया ट्रेलर मेकर्स कइत से रिलीज कीन गवा, जेका क्रिटिक्स अउर जनता कइत से नीक रिस्पॉन्स मिला अहै। हर कउनो ‘राजा शिवाजी’ के रिलीज के इंतजार करत अहै।

एह बीच ट्रेड एनालिस्ट तरण आदर्श अपने ऑफिशियल ‘एक्स’ हैंडल पर रितेश देशमुख के ‘राजा शिवाजी’ के एडवांस बुकिंग खुले के पक्की जानकारी दिहिन अहै। तरण के मुताबिक – मराठी वर्जन मा फिलिम ‘राजा शिवाजी’ के टिकटन के एडवांस बुकिंग आजुवे से शुरू होइ गय अहै। फिलिम का लय कइ फैंस मा जउन माहौल बना अहै, ओसे ई अंदाजा लगावा जाइ सकत अहै कि रितेश देशमुख के ई फिलिम बंपर एडवांस कलेक्शन करी।

अगर रितेश देशमुख के ‘राजा शिवाजी’ के रिलीज के तारीख पर नजर डारी जाय तौ 1 मई का ई पीरियड ड्रामा फिलिम सिनेमाघरन मा रिलीज कीन जाइ। बताइ दी कि आमिर खान के बेटवा अउर एक्टर जुनैद खान के रोमांटिक थ्रिलर ‘एक दिन’ से एकर बॉक्स ऑफिस टक्कर देखइ का मिली।

छत्रपति शिवाजी महाराज के कहानी ‘राजा शिवाजी’

दरअसल रितेश देशमुख के आवै वाली फिलिम ‘राजा शिवाजी’ महान मराठा योद्धा छत्रपति शिवाजी महाराज के बायोपिक आय। रितेश फिलिम मा उनकइ किरदार निभावत देखाय परिहैं। उनके अलावा ‘राजा शिवाजी’ मा संजय दत्त, जेनेलिया डिसूजा, अभिषेक बच्चन, विद्या बालन अउर फरदीन खान जइसन कइयौ कलाकार खास भूमिकन मा नजर अइहैं।