राष्ट्रपति द्रौपदी मुर्मू सोमवार क राष्ट्रपति भवन मा आयोजित एक नागरिक अलंकरण समारोह मा बॉलीवुड अभिनेता धर्मेंद्र अउर शास्त्रीय संगीतकार अउर वायलिन वादक एन राजम क मरणोपरांत पद्म विभूषण से सम्मानित कीनिन। कला के क्षेत्र मा असाधारण अउर खास योगदान बरे धर्मेंद्र क दीन गा ई पुरस्कार उनकर पत्नी अउर सांसद हेमा मालिनी लीहिन। राजम क भारतीय शास्त्रीय संगीत मा उनके खास योगदान बरे, खासकर ‘गायकी अंग’ शैली क माध्यम से वायलिन प्रस्तुति क नवा रूप देवे बरे दूसरे सबसे बड़े नागरिक सम्मान से सम्मानित कीन गा। राजम पंडित ओंकारनाथ ठाकुर से संगीत क गुर सीखे रहिन।
मुर्मू उत्तराखंड क पूर्व मुख्यमंत्री भगत सिंह कोश्यारी; चुनौतियन क सामना कइ रही पारंपरिक भारतीय कला ‘अवधान’ क फिर से जियइया शतावधानी आर गणेश; कोटक महिंद्रा बैंक क संस्थापक उदय सुरेश कुमार कोटक; अउर उदर रोग विशेषज्ञ कल्लीपट्टी रामासामी पलानीस्वामी क पद्म भूषण से सम्मानित कीनिन। राष्ट्रपति विज्ञापन गुरु पीयूष पांडे अउर पूर्व सांसद विजय कुमार मल्होत्रा क भी मरणोपरांत ई सम्मान से निवाजिन। पांडे क पत्नी अउर मल्होत्रा क बेटवा ई सम्मान लीहिन।
भारतीय महिला क्रिकेट टीम क कप्तान हरमनप्रीत कौर भुल्लर, अभिनेता प्रोसेनजीत चटर्जी, पैरा एथलीट प्रवीण कुमार अउर केंद्रीय रिजर्व पुलिस बल (सीआरपीएफ) क पूर्व महानिदेशक के. विजय कुमार क पद्मश्री से सम्मानित कीन गा।
राष्ट्रपति भवन क गणतंत्र मंडप मा भवा ई समारोह क शुरुआत राष्ट्रगीत वंदे मातरम क गायन से भइ, जेहके बाद राष्ट्रगान ‘जन गण मन’ गावा गा। कार्यक्रम मा उपराष्ट्रपति सी पी राधाकृष्णन, प्रधानमंत्री नरेन्द्र मोदी अउर केंद्रीय गृह मंत्री अमित शाह समेत कइयो गणमान्य लोग सामिल भइन।
राष्ट्रपति साल 2026 बरे 131 पद्म पुरस्कार देवे क मंजूरी दीहिन अहैं। एहमा पांच पद्म विभूषण, 13 पद्म भूषण अउर 113 पद्म श्री सामिल अहैं। ई पुरस्कार दुइ अलग-अलग अलंकरण समारोह मा दीन जाए क हैं। पद्म पुरस्कारन क घोषणा हर साल गणतंत्र दिवस क मौका पर कीन जात अहै। ई प्रतिष्ठित नागरिक सम्मान कला, सामाजिक काम, सार्वजनिक मामला, विज्ञान अउर इंजीनियरिंग, व्यापार अउर उद्योग, चिकित्सा, साहित्य अउर शिक्षा, खेल अउर सिविल सेवा समेत अलग-अलग क्षेत्रन मा दीन जात अहैं।
