रूस कय यूक्रेन पर सबसे बड़ा हवाई हमला

रूस यूक्रेन पर चार साल से चल रहय जुद्ध कय अब तक कय सबसे बड़ा हवाई हमला किहिस है। रूस यूक्रेन कय राजधानी कीव समेत कइयौ बड़े सहरन पर बुध अउर जुमेरात का 1,560 से जादा ड्रोन अउर लगभग 100 मिसाइल दागिस है। इन हमला मा कीव मा पांच जने अउर बाकी जगहिन पर छै जने मारे गय हयँ अउर दजनन लोग घायल हयँ। रूस कय ई हवाई हमला से आम जनता कय सुविधौन का भी भारी नुक़सान पहुँचा है। यूक्रेन अमेरिका अउर चीन से रूसी हमला रोकवावै कय बिनती किहिस है।

यूक्रेन कय रास्ट्रपति वोलोदिमीर जेलेंस्की कहे हयँ कि इनमा से जादातर ड्रोन अउर मिसाइल अकासवे मा मारि गिरावा गवा रहा, बाकिर जउन बच गय रहें, ऊ यूक्रेन कय सहरन मा भारी तबाही मचाइन हयँ। गिरे भय ड्रोन अउर मिसाइलन कय टुकड़न से भी मकानन अउर नागरिक सुविधौन का नुक़सान भवा है। जेलेंस्की कहेन कि ई हमला देखत ई नाहीं लागत कि जुद्ध जल्दी खतम होइ। बताइ दी कि हालही मा रूसी रास्ट्रपति व्लादिमीर पुतिन यूक्रेन जुद्ध जल्दी खतम होय कय संभावना जताय रहें।

कइयौ सहरन पर ड्रोन-मिसाइल दागिस

जेलेंस्की यूक्रेन कय सुरक्षा खतिन साथी देसन से अउर जादा मदद अउर एयर डिफेंस सिस्टम कय माँग किहिस है। जेलेंस्की बताइन कि कीव कय 20 जगहिन पर रूस हमला किहिस है। ई हमला मा पाँच जने मारे गय हयँ अउर दुई लरिकन समेत 40 लोग घायल हयँ। ड्रोन हमला मा एक नौ मंजिला बिल्डिंग ढहि गय है। राहत बचाव कय टीम कंक्रीट हटाके ओकरे नीचे दबे मनइन का ढूँढ रही हयँ। येहिकरन मरे अउर घायल होय वालन कय गिनती अउर बढ़ि सकत है। गृह मंत्री इहोर क्लीमेंको 10 मनइन कय गायब होय कय जानकारी दीन हयँ।

हमला मा 11 से जादा लोग मारे गय

जेलेंस्की बताइन हयँ कि रूस कय इन ताजा हमलन मा यूक्रेन कय 180 ठउरन का नुक़सान पहुँचा है। इनमा 50 से जादा रहै वाले मकान हयँ। हमला से कीव मा पानी अउर बिजली कय सप्लाई रुक गय है। यूक्रेन कय दूसर बड़े सहर खार्कीव मा हमला से तीन लरिकन समेत 28 जने घायल हयँ। बिजली घरन पर भय हमला से देस कय 11 प्रान्तन मा बिजली चली गय है। रूस ओडेसा बंदरगाह अउर रेल नेटवर्क का भी निशाना बनायस है। यूक्रेन कय बिदेस मंत्री आंद्री सिबिहा अमेरिका अउर चीन कय नेतन से रूस पर जुद्ध रोकै कय दबाव बनावै कय गुहार लगाइन हयँ।