अटल बिहारी वाजपेयी इकाना स्टेडियम मा क्रिकेट देखइ वालन बरे इतवार क दिन ‘सुपर संडे’ साबित भा। कोलकाता नाइटराइडर्स क 155 रनन क जवाब मा लखनऊ सुपर जायंट्स 19 ओवर क खतम होय पर सात विकेट खोय क 139 रन बनाय रहेन। एलएसजी का आखिरी ओवर मा जीत बरे 17 रनन क दरकार रही। कप्तान अजिंक्य रहाणे यूपी क कार्तिक त्यागी का गेंद सौपिन। त्यागी क साम्हनै स्ट्राइक पर मोहम्मद शमी रहेन। ऑफ स्टंप क बाहरि धीमि गति क ‘बैकआफ लेंथ’ गेंद का शमी स्लैश कीन, मुला गेंद कीपर क कइत चली गयी अउर शमी फुर्ती देखावत छोर बदल लिहिन। अब पूरी जिम्मेदारी हिम्मत सिंह पर रही। त्यागी क दूसरी गेंद ‘हाई फुल टॉस’ रही, जेका अंपायर ‘नो बाल’ कहिन। एक बार फिर फुल टॉस गेंद का हिम्मत सिंह लांगआन पर कैच लिहइ क बाद वापस फेंकिन, मुला ई गेंदो नो बाल करार दीन गयी। कार्तिक त्यागी तुरंतै रिव्यू मांगिन, पै तीसरे अंपायर क फैसला नाहीं बदला। गेंद कमर क काफी ऊपर रही। त्यागी क दूसरी गेंद पर हिम्मत डीप स्क्वायर लेग पर एक शानदार चौका मार क जीत क उम्मीद बढ़ाइन।
अब चार गेंद मा आठ रन चाहिन रहा, मुला धीमि गेंद का हिम्मत समझ नाहीं पाइन अउर डीप स्क्वायर लेग पर रिंकू सिंह एक बढ़िया कैच लपक क उनकी पारी खतम कइ दिहिन। त्यागी क चौथी गेंद पर लेग बाई से एक रन मिला। अब आखिरी गेंद पर लखनऊ का सात रन बनावे क रहा, जेपर मोहम्मद शमी लांग आफ पर एक जबरदस्त छक्का मार क मैच का सुपर ओवर मा पहुँचाए दिहिन।
सुपर ओवर मा अजिंक्य रहाणे अपने सबते पुराने फिरकी गेंदबाज सुनील नारायण पर भरोसा जताइन। LSG vs KKR मैच क सुपर ओवर मा कोलकाता कइसे जीता? एलएसजी क कइत से निकोलस पूरन अउर एडन मार्करम बल्लेबाजी करइ उतरिन, मुला नारायण पहिली गेंद पर ही पूरन का बोल्ड कइ क लखनऊ क जीत क उम्मीद लगभग खतम कइ दिहिन। एकरे बाद कप्तान ऋषभ पंत एक रन लय क छोर बदलिन, मुला सुनील तीसरी गेंद पर मार्करम का रिंकू क हाथ कैच करावत केकेआर क जीत पक्की कइ दिहिन। कोलकाता दू रन क लक्ष्य का पहिली गेंद पर चौका मार क सीजन क सबसे रोमांचक जीत दर्ज कीस। ई चौका रिंकू सिंह मारिन।
लखनऊ क फिर सरमनाक बल्लेबाजी
मोहसिन खान आइपीएल मा बेहतरीन गेंदबाजी कइ क लखनऊ सुपर जायंट्स क जीत क उम्मीद बढ़ाइन, मुला टीम क ढीली बल्लेबाजी उनकी मेहनत पर पानी फेर दीस। बेहद जरूरी मैच मा मोहसिन क खतरनाक स्पेल क दम पर एलएसजी 10.5 ओवर मा सिर्फ 73 रन क स्कोर पर केकेआर क आधी टीम का पवेलियन भेज दिहिस रहा। अइसन मा संकट मोचक रिंकू सिंह क्रीज पर पैर जमावे क बाद खाली 51 गेंद मा 83 रनन क नाबाद तूफानी पारी खेल क कोलकाता नाइटराइडर्स का 155 रनन क चुनौतीपूर्ण स्कोर तक पहुँचाए दिहिन। मोहसिन अजिंक्य रहाणे, टिम साइफर्ट, रोवमन पावेल, कैमरन ग्रीन अउर अनुकूल राय जैसन दिग्गज खिलाड़ी का आउट कइ क केकेआर का बैकफुट पर ढकेल दिहिन रहेन।
टी-20 मा जहाँ 265 रन क स्कोर सुरक्षित नाहीं बा, उहाँ अगर कोलकाता 155 रन बचाय लिहिस तौ एकरे बरे गेंदबाजी क साथै लखनऊ क सरमनाक बल्लेबाजी जिम्मेदार रही। मेजबान टीम लगातार दूसरे मैच मा 160 रन से कम क लक्ष्य पावे मा फेल रही। पूरन अउर मिचेल मार्श ई मैच मा निराश कीन। कप्तान पंत 42 अउर मार्करम 31 रन बनाइन, पै उ भरोसा नाहीं दिखा जेकरे बरे उ जान जाथे। लखनऊ क अपने घर मा ई लगातार आठवीं हार आय, जेसे उनके प्लेआफ क उम्मीद का तगड़ा झटका लगा बा।
केकेआर क जीत क नायक बने रिंकू
रिंकू सिंह जब बल्लेबाजी करइ उतरिन तौ केकेआर क स्कोर 10.5 ओवर मा 73 रन पर 5 विकेट रहा अउर टीम मुश्किल मा रही। रिंकू अपना पैर जमाइन अउर संभल क खेलिन। केकेआर 15 ओवर मा 93 रन पर रमनदीप सिंह क रूप मा सातवाँ विकेट खोय दिहिस, पै रिंकू क बल्लेबाजी पर एकर कवनो असर नाहीं पड़ा। उ 42 गेंद मा 6 चौका अउर 1 छक्का क मदद से अर्धशतक पूरा कीन। आखिरी ओवर मा रिंकू दिग्वेश राठी क गेंद पर कहर बन क टूटिन अउर लगातार चार छक्का मार क केकेआर का 150 क पार पहुँचाए दिहिन। रिंकू अपनी पारी मा कुल 7 चौका अउर 5 छक्का मारिन। उ मैच मा सबसे ज्यादा 5 कैच भी लपकिन।
मोहसिन क खतरनाक स्पेल
एकरे पहिले लखनऊ क कप्तान ऋषभ पंत टास जीत क पहिले फील्डिंग क फैसला कीन। मोहसिन खान टिम साइफर्ट (00) का आउट कइ क पहिली सफलता दिलाइन। एकरे बाद रहाणे अउर पावेल का भी जल्दी आउट कइ क केकेआर का मुश्किल मा डाल दिहिन।
सीजन क पहिले ‘आब्स्ट्रक्टिंग द फील्ड’ क शिकार बने रघुवंशी
केकेआर क युवा बल्लेबाज अंगकृष रघुवंशी अजीब तरीका से आउट भये। उ रन लेत समय जानबूझ क अपनी लाइन बदल लिहिन, जेसे फील्डर क थ्रो स्टंप पर न लाग पावे। अंपायर उनका ‘आब्स्ट्रक्टिंग द फील्ड’ (खेल मा बाधा डालब) आउट करार दिहिन। रघुवंशी आइपीएल इतिहास मा अइसन आउट होय वाले चौथे खिलाड़ी बनिन।
सुपर ओवर मा बना ई सरमनाक रिकार्ड
केकेआर क जीत क साथै आईपीएल इतिहास मा सुपर ओवर मा सबसे कम रन बनावे क नया रिकार्ड लखनऊ क नावें दर्ज होइ गवा। लखनऊ सुपर ओवर मा खाली 1 रन बनाय पाइस। एकरे पहिले 2020 मा पंजाब किंग्स दिल्ली क खिलाफ सुपर ओवर मा 2 रन पर आउट भई रही।
