आईपीएल के 19वें सीजन मा जीत कय छक्का लगावय वाली पंजाब किंग्स कय टीम अब हार कय हैट्रिक लगाय चुकी अहै। मौजूदा सीजन के 49वें मैच मा सनराइजर्स हैदराबाद कय टीम पंजाब किंग्स का 33 रन से मात दीहिस। इ जीत के साथै हैदराबाद कय टीम इ टूर्नामेंट मा आपन सातवीं जीत हासिल कइ लिहिस अउर अंक तालिका मा पहिले पायदान पर पहुँच गयी अहै। मैच मा टॉस जीतके पंजाब कय टीम पहिले गेंदबाजी करय कय फैसला लिहे रही, जौन गलत साबित भवा। पहिले बैटिंग करत भये एसआरएच कय टीम 235 रन कय पहाड़ खड़ा कइ दीहिस, जेकरे जवाब मा पीबीकेएस कय बैटिंग यूनिट उम्मीद के मुताबिक प्रदर्शन नाहीं कइ पाइन। टीम खातिर इ रन चेज मा कूपर कोनोली सबसे ज्यादा 107 रनन कय पारी खेलिन, लेकिन इ पारी के बावजूद टीम 20 ओवर मा 7 विकेट खोय के 202 रन ही बनाय सकी अउर इ मैच हैदराबाद 33 रन से जीत लिहिस।
कप्तान पैट कमिंस का मैच के बाद ‘प्लेयर ऑफ द मैच’ से नवाजा गवा। उ कमाल के कुछ कैच लपकैन अउर टीम खातिर शानदार गेंदबाजी कीहिन। दुई विकेट उनका मिला। प्लेयर ऑफ द मैच कय अवॉर्ड मिले के बाद उ कूपर कोनोली कय जमकर तारीफ कीहिन।
Pat Cummins मैच जीतय के बाद का कहिन?
पंजाब किंग्स का हरावे के बाद पोस्ट मैच प्रेजेंटेशन मा एसआरएच कय कप्तान पैट कमिंस से जब पूंछा गवा कि आपका सबसे नीक का लाग? तौ उ कहिन कि, “ढेर चीज अहैं। हमका लागत अहै कि पंजाब एक बहुतै नीक टीम अहै, इ मैच से पहिले उ नम्बर वन पर रही। हमका लगा कि हमार बल्लेबाज जौन स्कोर बनैन उ बहुतै बढ़िया रहा। ओकरे बाद मैच का खत्म करब, चाहे स्कोर जौनौ होय, अइसन टीम के खिलाफ दूसरी पारी मा गेंदबाजी करब हमेशा कठिन होत अहै, लेकिन हमका लगा कि हम बहुतै सलीके से खेल देखायन।”
ओकरे बाद जब उनसे इ पूंछा गवा कि पहिले बल्लेबाजी करत भये बढ़िया करय कय राज का अहै, तौ उ कहिन, “हमका लागत अहै कि हम अपनी लय मा खेलय मा माहिर अही। हम दबोच के या डरा-सहमा के शुरुआत करय कय कोशिश नाहीं करी। इ असल मा अभिषेक या ट्रेविस कय स्टाइल नाहीं अहै। इहै नाते हमार कोशिश बस ज्यादा से ज्यादा रन बटोरय कय होत अहै, हम कौनों खास टोटल के बारे मा नाहीं सोची। अउर फिर पारी मा बाद मा, अगर स्थिति बदलत अहै, तौ हम तालमेल बिठावय मा बहुतै पक्के अही।”
शाम के मैचन मा घरेलू मैदान कय फायदा उठाउब?
पैट कमिंस बताइन कि, “हम दिन वाले मैचन मा उतने नीक नाहीं अही। हम पिछले कुछ सालन मा हियां बहुतै बढ़िया क्रिकेट खेले अही। हमका लागत अहै कि इ मैदान हमार खेल कय ढंग का सूट करत अहै। आज रात भी गेंद थोड़ा ग्रिप होय रही रही, जौन आखिरी मा हमार कई गेंदबाजन खातिर मददगार साबित भवा। हमका अइसा लागत अहै कि खेल के बीच मा पिच चाहे जइसन करवट लेय, हम ओका पहिले देख चुके अही अउर हम खुद का ढाल सकत अही।” जब उनसे पूंछा गवा कि दिन के मैच मा संघर्ष काहे होत अहै, तौ उ हँसत भये कहिन कि, “ट्रेविस अक्सर ओई समय सोवत रहत अहैं जब उनके लरिका हियां नाहीं होत, तौ शायद इहै वजह होय सकत अहै।”
कमिंस आपन गेंदबाजी पर का कहिन?
एसआरएच कय कप्तान पैट कमिंस आपन गेंदबाजी पर कहिन, “हाँ, हम अपनी गेंदबाजी से खुश अही। हमका अबहूँ नाहीं मालूम कि हमका इ अवॉर्ड (प्लेयर ऑफ द मैच) कइसे मिलि गवा, लेकिन हमका बहुतै नीक लागत अहै। हम एकदम ताजा-दम होयके आये अही अउर हमार तैयारी तगड़ी रही। पावरप्ले मा कौनों भी टीम खातिर ज्यादा कुछ काम नाहीं आवा अहै, इहै नाते आज हम थोड़ा अउर फुर्ती दिखाय कय कोशिश कीन। हमार पास अपनी योजना रही, लेकिन ज्यादा विकल्प नाहीं रहे, इहै नाते हम बाउंसर डारे कय कोशिश कीन अउर नसीब से आज रात उ काम कइ गयी।”
कूपर कोनोली खातिर खोलिन दिल
कमिंस कहिन कि उनका बहुत खुशी भई अउर इ एक नीक नतीजा अहै। ऑस्ट्रेलिाई खिलाड़िन का बढ़िया परफॉर्म करत देख उनका नीक लागत अहै। कूपर कोनोली का लेके उ कहिन कि, “उ उनके खातिर इ सीजन बल्ले से स्टार रहे अहैं। फिलहाल गेंदबाजी नाहीं कइ रहे अहैं, लेकिन फिर भी एक बल्लेबाज के तौर पर आपन अहमियत देखाय रहे अहैं। ऑस्ट्रेलियाई क्रिकेट खातिर इ बहुतै नीक समय अहै।”
का इ SRH कय सीजन होय सकत अहै?
पैट कमिंस कहिन कि उनका अइसा उम्मीद अहै कि अभी थोड़ा समय बाकी अहै, तौ उ कुछ समय तक नम्बर वन पर रहय कय आनंद लिहें। फिर थोड़ा सफर अउर तय करय का अहै, लेकिन नम्बर वन होय के अलावा उ अउर कहीं नाहीं होय चाहत अहैं अउर उ बहुतै खुश अहैं।
