अमेरिका क राष्ट्रपति डोनाल्ड ट्रंप होर्मुज मा फँसे जहाजन का निकारे बरे ‘प्रोजेक्ट फ्रीडम’ क सुरुआत कीन हें।
अमेरिका के राष्ट्रपति डोनाल्ड ट्रंप होर्मुज जलडमरूमध्य मा फँसे व्यापारिक जहाजन क मदद बरे एक नई पहल क एलान कीन हें। डोनाल्ड ट्रंप येकर नाँव ‘प्रोजेक्ट फ्रीडम’ रक्खें हें। ट्रंप दावा कीन हें कि ई कोसिस दुनिया भर क उन देसन बरे अहै, जउन अमेरिका से मदद माँगे हें ताकि वे ई जरूरी समुद्री रस्ता से अपने जहाजन का सुरक्षित निकारि सकें।
डोनाल्ड ट्रंप ‘ट्रुथ सोशल’ पर एक पोस्ट मा बताइन कि दुनिया भर क कय्यू देसन अमेरिका से होर्मुज जलडमरूमध्य मा फँसे अपने जहाजन का सुरक्षित निकारे मा मदद क अरजी कीन अहै। उई जोर दई के कहिन कि ई देस पच्छिम एसिया मा चल रहे बखेड़ा मा कउनो भी तरह से सामिल नाहीं अहें।
फँसे जहाजन का निकारब बाहेर: ट्रंप
अमेरिकी राष्ट्रपति कहिन, “ईरान, पच्छिम एसिया अउर अमेरिका क भला बरे, हम इन देसन का बताय दीह अहै कि हम उनके जहाजन का इन रोक वाले जलमारगन से सुरक्षित बाहेर निकारब, ताकि उई बिना कउनो रोक-टोक के आपन काम-धंधा कइ सकें।”
ट्रंप बताइन ई अहै मानुसई क कोसिस
ट्रंप ई पहल का एक मानुसई कोसिस (Humanitarian effort) बताइन, जेकर मकसद चालक दल अउर व्यापारिक शिपिंग क सुरक्षा करब अहै। उई कहिन, “ई अमेरिका, पच्छिम एसियाई देसन अउर खास कइके ईरान क ओर से एक दया क काम अहै।” उई ईहू बताइन कि कय्यू जहाजन मा खाय-पिए क सामान अउर जरूरी चीजिन क कमी होइ रही अहै, जउन कि जहाज क सदस्यन क नीक ढँग से रहै बरे जरूरी अहै।
सोमवार सवेरे से सुरु होई अभियान
‘प्रोजेक्ट फ्रीडम’ क तहत जहाजन का सुरक्षित निकारे क काम सोमवार सवेरे (पच्छिम एसियाई समय) से सुरु होई। राष्ट्रपति ट्रंप बताइन कि उनके प्रतिनिधि ईरान क साथे बहुत नीक बात-चीत कर रहे हें। उई ई बात पर जोर दीहिन कि ई कदम उन मनइयन, कंपनियन अउर देसन का आजाद करै बरे अहै जे कउनो गलती नाहीं कीन हें। उई कहिन कि ई लोग हालात क मार अहें।
ट्रंप दिहिन दखलंदाजी पर कड़ा चेतउनी
राष्ट्रपति ट्रंप ई मानुसई काम मा कउनो भी तरह क दखलंदाजी के खिलाफ कड़ी चेतउनी जारी कीन हें। उई कहिन, “अगर कउनो भी तरह से ई नेक काम मा अड़ंगा डारा गा, तौ बदकिस्मती से ओसे ताकत के जोर पर निपटा जाई।”
