अमेरिका अउर ईरान के बीच तनातनी कम होय के इसारन के बीच ब्रिटिश नौसेना भी होर्मुज जलडमरूमध्य से बेपारी जहाजन के बिना कौनों रोक-टोक के आवै-जाय बरे समुद्री बारूदी सुरंग हटावै के तैयारी कइ लिहे अहै। जिब्राल्टर मा तैनात आरएफए लाइम बे पर सैकड़न के गिनती मा नौसैनिक एही मिशन मा हिस्सा लेइ बरे बाट जोहत अहैं। धियान रहे कि होर्मुज स्ट्रेट मा दबाव बनावै बरे आइआरजीसी नौसेना बहुत भारी मात्रा मा समुद्री बारूदी सुरंग बिछाय रखिस अहै। साथे ई हुकुम भी देहे अहै कि होर्मुज से जाय वाले जहाजन का आइआरजीसी के बत्ताए रास्ता के पालन करत भए ही निकरे का परी।
ईरान के साथे लड़ाई के दौरान होर्मुज स्ट्रेट मा आवाजाही ठीक ठाक करै बरे बारूदी सुरंग हटावै का जब कौनों साथी देश आगू नाहीं आवा, तौ अमेरिकी राष्ट्रपति डोनाल्ड ट्रंप नाटो देसन का आड़े हाथेन लिहिन रहा। ओहिजे, नाटो देसन का कहब रहा कि ओईं ईरान लड़ाई मा हिस्सा नाहीं लिहइहैं, बल्कि जब माहौल ठीक-ठाक होइ जाई तौ ओईं होर्मुज से माइंस हटावै मा मदद करै बरे तैयार अहैं।
लाइबेरियन प्रायद्वीप के दक्खिनी छोर पर, ब्रिटिश विदेशी इलाका जिब्राल्टर मा, ब्रिटेन की रायल नेवी अइसन करै के तैयारी करत अहै, मुला ई तबै होई जब कौनों शांति समझौता होइ जाई। ट्रंप संनिचर का कहिन कि ईरान के साथे समझौता का लैके बड़ी सहमति बनि गय अहै, हालांकि एका आखिरी रूप देब अउर बाकी अहै।
ब्रिटेन के रच्छा मंत्री अर कार्न्स मीडिया के साथे आरएफए लाइम बे का दौरा कीहिन। एही जुद्धपोत पर ब्रिटेन अउर फ्रांस, दुनहुं देसन के सैनिक सवार अहैं। ई एक एंफिबियस जुद्धपोत अहै, जेह पर हथियार अउर समुद्री माइंस का तबाह करै वाले समुद्री ड्रोन लदे अहैं।
ईरान इजरायली टोही ड्रोन का मारि गिराइस
ईरानी सेना होर्मुजगान सूबा के ऊपर उड़त भए इजरायल के जासूसी टोही ड्रोन का मारि गिरावै का दावा कीहिस अहै। रायटर मेहर न्यूज एजेंसी के हवाले से बतैस कि ईरानी नौसेना के जवानन इजरायली आर्बिटर ड्रोन के मलबा बरामद कइ लिहिन अहै।
