दुइ दिन पहिले 265 रन बनाय के बादौ हार क दरद झेलै वाली दिल्ली कैपिटल्स अभी उ सदमे से उबरौ नाहीं पायी रही कि रॉयल चैलेंजर्स बेंगलुरु (आरसीबी) के गेंदाबाजन ओकर घाव अउर गहरा कय दिहन। अरुण जेटली स्टेडियम मा दिल्ली क बल्लेबाजी जइसन बिखरी, उ ई सीजन क सबसे सरमनाक तस्वीर देखाय दिहिस। दिल्ली 16.3 ओवर मा खाली 76 रन ही बनाय सकी, जेका आरसीबी एक विकेट खोय के हासिल कइ लिहिस।
भुवनेश्वर कुमार अउर जोश हेजलवुड की अगुआई मा आरसीबी के गेंदाबाजन अइसन तूफ़ान खड़ा कय दिहन कि दिल्ली क बल्लेबाज टिकै क हिम्मतौ नाहीं जुटा पाइन। पहिले ही ओवर मा भुवनेश्वर डेब्यू कइ रहे साहिल पारेख का बोल्ड कय के खाता खोलिन, तौ अगले ओवर मा हेजलवुड केएल राहुल अउर समीर रिज़वी का चलता कय के दिल्ली क कमर तोड़ दिहन। एकरे बाद जे भवा, उ कवनो भी टीम बरे डरावना सपना नियर रहा। विकेटन क अइसन झड़ी लागी कि दिल्ली क बल्लेबाज आवत गय अउर जात गय। पावरप्ले खतम होय से पहिले ही छह बल्लेबाज पवेलियन लउटि चुके रहे अउर स्कोरबोर्ड पर खाली 13 रन दर्ज रहा, जे आईपीएल इतिहास क सबसे कम पावरप्ले स्कोर बनि गवा।
दिल्ली क बल्लेबाजी मा न तौ धीरज दिखा, न संघर्ष। हर गेंदा मा हड़बड़ी, गलत शॉट क चुनाव अउर बढ़त दबाव—ई तीनों मिलके पूरी पारी का बरबाद कय दिहन। ई खाली एक खराब शुरुआत नाहीं रही, बलुक आत्मविश्वास क पूरी तरह टूट जाय क कहानी रही। लछ्य क पीछा करै उतरी आरसीबी क टीम महज 6.2 ओवर मा ही जीत हासिल कइ लिहिस। आरसीबी नौ विकेट से मैच जीत लिहिस। आरसीबी क टीम लछ्य क पीछा करत भए तेज शुरुआत कीस। पावरप्ले मा ही टीम 65 रन बनाय लीहिस। आरसीबी क बल्लेबाजी के दौरान एकौ पल अइसन नाहीं लाग कि ई वही पिच आय जेह पर दिल्ली क बल्लेबाज रन बनावै बरे तरसत रहे। विराट कोहली अउर देवदत्त क तेज पारी के दम पर टीम 13.3 गेंद पहिले ही मुकाबला खतम कय दिहिस।
भुवनेश्वर भारतीय टीम मा वापसी क दावेदारी मजबूत कीन
भुवनेश्वर कुमार तीन विकेट लय के पर्पल कैप पर कब्जा जमाय लिहिन। आठ मैचन मा उनकर 14 विकेट होय चुके अहैं, जेसे भारतीय टीम मा वापसी क उनकर दावेदारी अउर मजबूत भई अहै। भुवनेश्वर पारी क दूसरी ही गेंदा पर दिल्ली क ओपनर बल्लेबाज का यॉर्कर गेंदा पर क्लीन बोल्ड कय दिहन, उ अइसा गेंदा रहा जेका बल्लेबाज समझै नाहीं पाइन अउर आपन विकेट गंवाय बइठे।
आंधी से कुछु देर रुका मुकाबला
दिल्ली क पारी के नौवें ओवर के बाद धूरि भरी आंधी के कारन लगभग पांच मिनट खेल रोकै का पड़ा। कम देखाय (visibility) के नाते खिलाड़िन अउर अंपायरन का परेशानी भई।
पोरेल बचाइन दिल्ली क लाज
इम्पैक्ट प्लेयर अभिषेक पोरेल 30 रन बनाय के टीम का अउर बड़े सरमनाक रिकार्ड से बचाय लिहिन। डेविड मिलर 19 रन क योगदान दिहन। आरसीबी क ओर से भुवनेश्वर, हेजलवुड अउर रसिख सलाम कुल मिलाय के आठ विकेट झटकिन।
घरे मा दिल्ली क लगातार तीसरी हार
अरुण जेटली स्टेडियम मा दिल्ली क टीम मुंबई इंडियंस के खिलाफ पहिला मुकाबला जीतै के बाद से लगातार तीन हार झेलिस अहै। दिल्ली आपन मजबूत बल्लेबाजी बरे ई सीजन मा जानी जात अहै, मुला टीम एकरे उलट परदरसन करत अहै। गुजरात के खिलाफ एक रन से हार के बाद, गेंदाबाजन क बड़ा स्कोर खड़ा करै के बादौ आईपीएल क बड़ी हार झेलै का पड़ी। वहीं तीसरी बार आरसीबी दिल्ली का ओकरे घरे मा ही हार क मूंह देखाय दिहिस।
नटराजन लपकिन आईपीएल क सबसे नीक कैच
लछ्य क पीछा करै उतरे आरसीबी के ओपनर बल्लेबाज जेकब बेथल क कैच जउन हिसाब से टी नटराजन पकड़िन, उ मैदान मा आए देखइया मनइन का मोह लिहिस। पारी के तीसरे ओवर मा बेथल गेंदाबाज काइल जेमिसन की गेंदा पर दुइ लगातार छक्का मार चुके रहे। वहीं ई ओवर का अउर बड़ा बनावै बरे चौथी गेंदा पर बेथल डाउन द ग्राउंड सोझै कइती शॉट खेलिन, जउन बाउंड्री मा जाय से पहिले ही गेंदा क उलटी दिशा मा दउड़त भए नटराजन आईपीएल 2026 क सबसे शानदार कैच लपक लिहिन।
