कोलकाता नाइट राइडर्स के स्टार बैटर रिंकू सिंह अतवार के भये मैच मा एक दइ फिर ई साबित कइ दिहिन कि काहे उनका मैच फिनिश करै बरे जानल अउर पहिचानल जात है। लखनऊ सुपर जायंट्स के खिलाफ जब उनकी टीम जूझत रही, तबै रिंकू अकेले दम पे टीम क पारी सम्हारिन अउर 155 रन क स्कोर बनावै मा मदद किहिन। मैच मा रिंकू क उत्साह बढ़ावै बरे उनकी मंगेतर प्रिया सरोज भी हुआँ मौजूद रहीं। ओन्हैं रिंकू क ई पारी क लेके बताइन कि ई पारी उनके ससुर यानी रिंकू के पिता जी बरे रही।
रिंकू के पिता का याद कइके भावुक भइन प्रिया
असल मा, केकेआर अपने इंस्टाग्राम अकाउंट पर एक वीडियो साझा करे अहै, जेहिमा प्रिया सरोज रिंकू क चीयर करत नजर आईं। वीडियो मा ओन्हैं कहिन, “हम बहुत खुश अहन अउर आज जउन ऊ खेलिन हय, ऊ हमार ससुर जी बरे अहै। हम आज उनका बहुत याद करित अहन। ई उही बरे अहै।” बतावा जाय कि रिंकू सिंह के पिता खानचंद्र सिंह क निधन टी20 विश्व कप 2026 के दौरान 27 फरवरी का भवा रहा। उनका स्टेज 4 लीवर कैंसर रहा।
रिंकू सिंह क आईपीएल क सबसे नीक पारी
केकेआर कइत से रिंकू अपने करियर क सबसे नीक पारी खेलिन। 51 गेंद क सामना करत भये 5 छक्का अउर 7 चौका क मदद से ऊ नाबाद 83 रन बनाइन। ओन्हैं कैमरन ग्रीन (34) के साथे पाँचवें विकेट बरे 42 अउर सुनील नारायण (नाबाद 4) के साथे आठवें विकेट बरे 30 गेंद मा 62 रन क नाबाद साझेदारी किहिन।
उनके सिवा रहाणे खाली 10 रन बनाय पाइन। रिंकू क ई पारी से केकेआर 20 ओवर मा 7 विकेट खोय के 155 रन तक पहुँच सकी। बाद मा मैच सुपर ओवर मा पहुँच गवा, जहाँ रिंकू सुपर ओवर मा चौका लगाय के अपनी टीम का मैच जिताय दिहिन। ई मैच जिताऊ प्रदर्शन बरे रिंकू का ‘प्लेयर ऑफ द मैच’ से नवाजा गवा।
