जौ आप कहुँ पइसा लगावइ चाहत अहैं, तौ बजार मा निवेश कय कइयौ विकल्प मौजूद अहैं। इन विकल्पन् मा पइसा लगाइके कम समय मा मोटी कमाई कीन जा सकत है। कइयौ विकल्प अइसन अहैं, जेहमा थोरी-थोरी रकम निवेश कीन जा सकत है। मुला प्रॉपर्टी जइसन विकल्प मा निवेश करइ बरे एक साथै बड़ी रकम चही। लकिन हर केहू के पास प्रॉपर्टी खरीदइ बरे बड़ी पूंजी नाहीं होत। अइसन मा रीट्स यानी आरईआईटी (Real Estate Investment Trusts) अउर इनविट्स यानी आईएनवीआईटी (Infrastructure Investment Trust) आम निवेशकन बरे नीक विकल्प बनिके उभरे अहैं। ई अइसन विकल्प अहैं, जेकरे जरिये आप कम पइसा मा भी रियल एस्टेट अउर इंफ्रास्ट्रक्चर प्रोजेक्ट्स मा निवेश कइके रेगुलर इनकम कमाइ सकत अहैं।
का होथें रीट्स?
रीट्स अइसन कंपनी या ट्रस्ट होथें जौन बड़े-बड़े कमर्शियल प्रॉपर्टी जइसन मॉल, ऑफिस, आईटी पार्क आदि मा निवेश करथें। इन प्रॉपर्टी से होय वाले मुनाफ़ा कय करीब 90 प्रतिशत लाभांश (डिविडेंड) के रूप मा निवेशकन मा बाँटा जात है।
इनविट्स का होथें?
इनविट्स यानी आईएनवीआईटी इंफ्रास्ट्रक्चर प्रोजेक्ट्स जइसन हाईवे, पावर प्लांट, गैस पाइपलाइन आदि मा निवेश करथें अउर उहाँ से मिलइ वाली आय का निवेशकन तक पहुँचावथें। ई दुनऊ विकल्प आपक बिना सीधे प्रॉपर्टी खरीदे नियमित आमदनी कय मौका देत अहैं। उदाहरण के तौर पर, जदि आपके पास 1 लाख रुपिया अहैं, तौ आप सीधे ऑफिस स्पेस नाहीं खरीद सकत हय, मुला रीट्स के जरिये आप कउनौ बड़े कॉर्पोरेट पार्क कय आंशिक मालिक बनिके हर महीना या तिमाही किराया कय आमदनी पाय सकत हय।
इनमा निवेश कइसे कीन जात है?
जौ निवेश के तरीका कय बात कीन जाय तौ रीट्स अउर इनविट्स मा निवेश करब काफी आसान अहै। ई शेयर बजार मा लिस्टेड होथें, एहबरे आप इनखा ओसही खरीद अउर बेंच सकत हय जइसे कउनौ कंपनी के शेयर खरीदत हय। एकरे बरे आपके पास एक डीमैट अकाउंट अउर ट्रेडिंग अकाउंट होब जरूरी अहै। आप अपने ब्रोकरेज प्लेटफॉर्म के जरिये ई यूनिट्स का खरीद सकत हय अउर जरूरत पड़इ पर बेंच भी सकत हय।
जानकार का कहत अहैं?
जानकारन के मुताबिक, इनमा निवेश करइ के कइयौ फायदा अहैं। सबसे बड़ा फायदा ई अहै कि आपक नियमित आय मिलत है, काहेकि नियमन के मुताबिक ई ट्रस्ट अपनी कमाई कय बड़ा हिस्सा निवेशकन का देथें। एकरे अलावा, कम पूंजी मा बड़े एसेट्स मा निवेश कय मौका मिलत है, जेहसे आपका पोर्टफोलियो भी डाइवर्सिफाई होत है। साथै, शेयर बजार मा लिस्टेड होइ के नाते इनमा लिक्विडिटी भी रहत है, यानी आप जरूरत पड़इ पर आसानी से पइसा निकाल सकत हय।
जोखिम कय रखव धियान
हर निवेश के नइयाँ इनहु मा कुछ जोखिम होथें, जेकर धियान रखब जरूरी अहै। जइसे कि रियल एस्टेट या इंफ्रास्ट्रक्चर सेक्टर मा मंदी आइ जाय पर रिटर्न प्रभावित होइ सकत है। ब्याज दरन मा बदलाव कय भी इन पर असर पड़त है। एकरे अलावा, जउन प्रोजेक्ट या प्रॉपर्टी मा निवेश कीन गवा अहै, ओकर गुणवत्ता अउर लोकेशन भी काफी मायने राखत है।
जानकारन कय कहब अहै कि निवेश करइ से पहिले कुछ जरूरी बातन कय धियान राखइ चही। सबसे पहिले ई देखव कि रीट या इनविट कइसन एसेट्स मा निवेश करत अहै अउर ओकर ट्रैक रिकॉर्ड कइसन अहै। मैनेजमेंट कय विस्वास, डिविडेंड यील्ड, कर्ज कय स्तर अउर भविष्य कय बढ़त कय संभावना भी जरूर चेक करव। साथै, अपने निवेश लक्ष्य अउर जोखिम लेवे कय क्षमता के हिसाब से ही फैसला लेव। सही जानकारी अउर समझदारी के साथ कीन गवा निवेश आपक लंबे समय मा नीक रिटर्न देइ सकत है।
