रितेश देशमुख अउर जेनेलिया डीसूजा चाहइ वालन के सबसे नीक जोड़ियन मा से एक अहैं। दुनहुं के बियाह का 14 साल से ढेर समय बीति चुका बा, मुला जेहि तरे अभिनेता अपनी मेहरारू के मान-सम्मान करत हें, ऊ मनइन का बहुतै नीक लागत है। हालांकि, इनकर पहिली मुलाकात के किस्सा कुछु अउरै रहा। जब जेनेलिया पहिली दाइं बॉलीवुड अभिनेता रितेश देशमुख का देखिन, तौ तुंरतै उनते मुँह फेरि लीनिन, जेकर खुलासा खुद अभिनेत्री एक इंटरव्यू के दौरान कीनिन अहै।
ई फिलिम के दौरान भई रही पहिली मुलाकात
रितेश देशमुख अउर उनकी मेहरारू व अभिनेत्री जेनेलिया देशमुख की पहिली मुलाकात फिलिम ‘तुझे मेरी कसम’ के दौरान भई रही अउर ई बीच दुनहुं एक-दूसर से बातौ नाहीं कीनिन रहा। एकर कारन रितेश देशमुख नाहीं, बल्कि जेनेलिया रहीं, जिनका अभिनेता पहिली नजर मा कतय नीक नाहीं लागे रहेन। जेनेलिया देशमुख बताइन, “हम रितेश का इहै नाते इग्नोर कीन रहा काहे से कि हम एक मध्यम वर्गीय परिवार से आवा रहेन। ऊ महाराष्ट्र के पूर्व मुख्यमंत्री विलासराव देशमुख के बेटवा रहेन। हमका लाग कि उनके भीतर घमंड होई। इससे पहिले कि ऊ हमका इग्नोर करैं, हमैं कर दीन।”
जेनेलिया देशमुख पूँछिन- कहां अहैं सिक्योरिटी?
उहईं रितेश बताइन, “फिलिम के स्क्रीन टेस्ट खातिर हम हवाई जहाज से हैदराबाद जात रहेन। जउन मनई हैदराबाद मा लिआवै आए रहेन, ऊ मिलवाइन कि ई अभिनेत्री अहैं। जेनेलिया देखिन अउर ‘हैलो’ बोलिकैं मुड़ि गइन। जब हम स्क्रीन टेस्ट करत रहेन, तौ एक बेंच पर बैठे रहेन। ऊ हमसे पूँछिन कि आपकी सिक्योरिटी कहाँ अहै? हम बतावा कि हम अउर हमार भाई सिक्योरिटी लेके नाहीं चलित हन।”
जेनेलिया आगे कहिन, “जब हमका पता चला कि कउनौ सिक्योरिटी नाहीं अहै, तब हमका लाग कि ई तौ जमीन से जुड़े मनई अहैं। फिर हम उनसे बात करब शुरू कीन।” आप सब का बताइ देई कि जेनेलिया अउर रितेश देशमुख के ऑफस्क्रीन जोड़ी के साथै-साथै ऑनस्क्रीन जोड़ी भी हिट रही अहै। दुनहुं साथै ‘तुझे मेरी कसम’ के अलावा, ‘तेरे नाल लव हो गया’, ‘मस्ती’ अउर मराठी सुपरहिट फिलिम ‘वेड़’ मा साथै काम कीनिन। अब ऊ सब जल्दीय ‘राजा शिवाजी’ मा देखाई दैहें, जउन 1 मई का सिनेमाघरन मा रिलीज होत अहै।
