प्रधानमंत्री नरेन्द्र मोदी पूर्वोत्तर भारत का देस कय ‘अष्टलक्ष्मी’ बताइन अउर ‘एक्ट ईस्ट’ अउर ‘एक्ट फास्ट’ नीति के तहत सिक्किम मा हजारन करोड़ रुपिया कय 30 विकास योजनान कय जिक्र कीन। उहाँ कय स्थानीय अर्थब्यवस्था का मजबूत करै बरे उ पर्यटन पै आय मनईन से अपील कीन कि उ आपन बजट कय कम से कम पांच फीसदी हिस्सा उहईं कय बनल सामान खरीदे मा खरच करैं। उ स्वयं सहायता समूह कय सामान का दुनिया भर कय बाजार तक पहुँचावै पर भी जोर दीन। उ सिक्किम कय भारत मा मिले के 50 साल पूरा होय के मौका पर आयोजित कार्यक्रम का संबोधित करत रहेन।
इके पहिले सोमवार का प्रधानमंत्री गंगटोक मा पद्म पुरस्कार पावै वाले अउर अलग-अलग क्षेत्र मा नीक काम करै वाले मनईन से भेंट कीन। प्रधानमंत्री सिक्किम कय कुदरती सुंदरता, शांति अउर आध्यात्मिक ऊर्जा कय जमकै तारीफ कीन। कहिन कि सिक्किम कय सुंदरता उनका मन मोह लिहिस है। उ उहाँ कय ‘आर्किड गार्डन’ मा तय समय से जादे देर तक रहेन। उ देस-बिदेस कय सैलानियन से, खास कइके जेका प्रकृती से प्रेम है, उनते सिक्किम आय कय न्योता दीन। कहिन कि अगर सिक्किम कय ‘आर्किड’ नाहीं देखेव, तौ समझो कुछौ नाहीं देखेव। उनकय पूरा भरोसा है कि आवै वाले समय मा सिक्किम मा घूमैं आवै वाले मनईन कय गिनती नया रिकार्ड बनाई।
उ सिक्किम कय 50 साल पूरा होय का खाली एक राज्य कय उत्सव नाहीं, बल्कि कुदरत अउर संस्कृति के तालमेल कय दुनिया बरे एक उदाहरण बताइन। उ कहिन कि जब देस कय कई हिस्सा मा भाषा, संप्रदाय अउर जात-पात जइसन दिक्कतन का सामना करय पड़त है, तब सिक्किम ‘एक भारत, श्रेष्ठ भारत’ कय एक मजबूत मॉडल पेस कीन है। एक छोटहन राज्य पूरे देस कय दिल जीत लिहिस है, इहै राष्ट्रीय एकता कय सबसे बड़ा संदेसा आय। उ सिक्किम मा सफाई कय भी खूब बड़ाई कीन अउर कहिन कि उहाँ कय नागरिक सफाई कय असली ‘ब्रांड एंबेसडर’ आहीं।
लइकान के साथ खेलिन फुटबाल
प्रधानमंत्री मंगलवार सबेरे उहाँ कय लइकान के साथ फुटबाल भी खेलिन। उ इ अनुभव का बहुतै ऊर्जावान बताइन अउर कहिन कि गंगटोक कय सुहानी सबेरे मा लइकान के साथ खेलब बहुत खास रहा। उ इ तसवीरन का सोशल मीडिया प्लेटफार्म ‘एक्स’ पर भी साझा कीन। ‘एक्स’ पर लिखिन कि गंगटोक कय सुहानी सबेरे मा अपने युवा दोस्तन के साथ फुटबाल खेलै जइसन कउनो अउर बात नाहीं। इ सत्र सच मा मन मा जोस भरै वाला रहा।
