पश्चिमी एशिया मा चलत लड़ाई के कारन ईरानी पिस्ता अउर खजूर के दाम 20 फीसदी तक बढ़ि गय हैं, जेहिसे भारत क करोड़ों क ड्राईफ्रूट बाजार दबाव मा है।
पश्चिमी एशिया के जुद्ध क असर अब खाली क्रूड ऑयल अउर गैस तक ही नाहीं रहा, बल्कि अब खाय-पियै वाली चीजिन पर भी दिखै लाग है। ‘स्ट्रेट ऑफ हॉर्मुज’ के बंद होय से दुनिया के कइयौ देसन मा सप्लाई चेन पर गहरा असर परा है। सप्लाई चेन प्रभावित होय से ईरानी पिस्ता अउर खजूर जइसन ड्राईफ्रूट्स के दाम मा 10-20 फीसदी क बढ़त देखी गय है।
ईरान आय ग्लोबल सप्लायर
भारत के ‘नट्स एंड ड्राई फ्रूट्स काउंसिल’ के उपाध्यक्ष राहुल कामथ मीडिया से बतियात भवा बताइन कि ईरान पिस्ता अउर खजूर जइसन सूखा मेवा क ग्लोबल सप्लायर आय। अभी ईरान मा जारी संघर्ष के कारन हिनकर उपलब्धता मा लगभग 30 फीसदी क कमी आई है। उहइ बताइन कि भारत मा पिस्ता क बाजार लगभग 5,000 करोड़ रुपिया क अहै, जबकि खजूर क बाजार लगभग 3,000 करोड़ रुपिया क अहै। हमरें हियाँ ईरानी चीजिन का मनई बहुतै पसंद करथिन। राहुल कामथ ईहो कहे कि अभी ड्राईफ्रूट्स क बंपर मांग क सीजन नाहीं अहै, तेहिसे मामला कुछ हद तक संभरा है।
तस्करी क खबरिहूँ आई सामनें
मिडिल ईस्ट मा चलत तनाव के कारन ईरानी ड्राईफ्रूट्स की सप्लाई मा दिक्कत आई है, अइसन मा कइयौ जगह छोटे लेवल पर ड्राई फ्रूट्स की तस्करी क खबरिहूँ सामनें आई हैं। हालांकि ई रस्ता बहुतै जोखिम भरा है, खास कइके ‘हॉर्मुज जलडमरूमध्य’ जइसन इलाकन मा कड़ी निगरान के कारन अइसन करब आसान नाहीं अहै। वहिन दूसरी ओर, ईरान क तरफ से निर्यात (एक्सपोर्ट) पर लगाय पाबंदिन भी भारत अउर यूरोपियन बाजार मा किल्लत का अउर बढ़ाय दीन्ह है।
तेजी से बढ़त ड्राईफ्रूट्स बाजार
मीडिया रिपोर्ट्स के मुताबिक दुनिया भर मा सूखा मेवा क बाजार लगातार बढ़त है अउर 2026 तक हेकर 11.06 अरब डॉलर तक पहुँचै क उम्मीद है। प्रीमियम क्वालिटी अउर सेहत के फायदन के कारन स्नैक्स क मांग तगड़ी बनी है, मुला जियो पॉलिटिक्स के चक्कर मा सप्लाई चेन वर्तमान मा दबाव मा है। वहिन दूसरी ओर, भारत मा काजू क थोक भाव लगभग ₹12,800 प्रति क्विंटल अहै। ट्रांसपोर्टिंग खर्चा बढ़ै अउर मानसून कमजोर रहै क आशंका के कारन आवै वाले महीनन मा W240 अउर W320 जइसन मशहूर वैरायटी के दाम बढ़ि सकत हैं।
