आगरा: रिमझिम बुन्नी-बान्दी अउर तेज हवा से आगरा मा जोरा क घाम अउर गर्मी से चैन मिलिस, जेसे पारा सामान्य से नीचे आइ गवा। पच्छिमी बिच्छोभ (वेस्टर्न डिस्टर्बेंस) क असर से मौसम सुहाना होइ गवा अउर आगे भी आन्धी-बुन्नी क संभावना जताई गय है। जोरा क तपन अउर लू से हलाकान मनइयन का बुधवार क मौसम राहत पहुंचाइस। सुबेरे से बदरी छाई रही। दुपहरी मा बुन्नी-बान्दी से गर्मी मा सुकूँ मिलिस, उहईं दिन भर तेज हवा चलत रही।
सहर मा बूंदाबांदी भई तौ देहात मा कइयौ जगह जोरा क पानी गिरिस, जेसे कइयौ जगह जलभराव भी होइ गवा। हालांकि सहर मा तापमान 38 डिग्री दर्ज कीन गवा, जौन सामान्य से 2.1 डिग्री सेल्सियस कम रहा। बुधवार का पच्छिमी बिच्छोभ के कारन आगरा अउर आसपास क जिला मा मौसम सुहाना बना रहा। दिन भर बदरिन क आवाजाही लगी रही अउर दुपहरी मा बुन्नी-बान्दी से मनइयन का लू से राहत मिली।
बीते कइयौ दिन से दिन मा पारा 43 डिग्री क लगे पहुंच गवा रहा, मुला बुधवार का ई 38 डिग्री दर्ज कीन गवा। न्यूनतम तापमान 27 डिग्री रहा जौन सामान्य से 3.2 डिग्री बेसी दर्ज कीन गवा। बुन्नी-बान्दी से सुहाने मौसम क कारन दुपहरी मा बाजार अउर दुकानन मा मनई देखाई दिहिन, जबकि अउर दिनन मा दुपहरी 12 से साँझ 5 बजे तक ग्राहक नदारद रहत रहे।
मौसम विभाग क पूर्वानुमान केंद्र क मुताबिक पच्छिमी उत्तर प्रदेश मा दुपहरी मा दुई से तीन डिग्री क बढ़ौतरी होइ सकत है, मुला आन्धी अउर बुन्नी-बान्दी क भी आसार अहैं। पच्छिमी उत्तर प्रदेश मा आगरा समेत कछू जिला मा 40 से 50 किमी. प्रति घंटा क रफ़्तार से आन्धी आवै क संका है।
बीते 5 सालन मा 29 अप्रैल क तापमान:
2026: अधिकतम 38, न्यूनतम 27
2025: अधिकतम 37.2, न्यूनतम 23.9
2024: अधिकतम 42, न्यूनतम 24
2023: अधिकतम 32.7, न्यूनतम 23.2
2022: अधिकतम 45.5, न्यूनतम 26.2
