वैभव सूर्यवंशी के बल्लेबाजी क मुरीद भये इयान बिशॉप, गेंदबाजिन का दिहिन बड़ी चेतावनी।
वैभव सूर्यवंशी खाली 15 साल क उमिर मा अपने बल्ला से गेंदबाजिन के मन मा खौफ भरि दिहे अहैं। लगातार दुई सीजन से ई बल्लेबाज आईपीएल मा तहलका मचाये है। अइसन मा बहुत लोग उनकर दीवाना होइ गय अहैं, जेहिमा अब एक नया नाउँ जुड़ि गवा है। ई अहैं दुनिया के खौफनाक गेंदबाजिन मा गिने जाय वाले वेस्टइंडीज के इयान बिशॉप। बिशॉप वैभव क जम के तारीफ करे अहैं।
ऊ खाली राजस्थान रॉयल्स के ओपनर क तारीफै नाहीं करे अहैं, बल्कि गेंदबाजिन का सीखौ दिहे अहैं, जेकर साफ मतलब ई है कि रंचो भर चूके तौ गेंदा बाउंड्री के पारै जाय क है।
मजबूत अहैं वैभव
वैभव ई सीजन मा गजब क बल्लेबाजी करे अहैं अउर ऊ लगातार ऑरेंज कैप की रेस मा बने अहैं। ऊ ई सीजन मा खाली 36 गेंद मा शतकौ मारि चुके अहैं, जेका ऊ सनराइजर्स हैदराबाद के खिलाफ बनाये रहेन। इहै टीम के खिलाफ ऊ ई सीजन के पहिले मैच मा ‘गोल्डन डक’ क शिकार भवा रहेन।
बिशॉप मीडिया से बात करत भवा कहेन, “हमका लागत है कि साइकॉलोजिकली अउर कैरेक्टर के हिसाब से, ऊ बहुतै मजबूत अहैं काहे से ऊ आसानी से दुनिया के दिग्गज गेंदबाजिन क सामना करि रहे अहैं।” ऊ आगे कहेन, “यही तरे ऊ दिमागी रूप से दुनिया के सबसे नीक गेंदबाजिन का सामना करै बरे तैयार अहैं। ऊ जसप्रीत बुमराह का आड़े हाथिन लिहिन। तकनीकी तौर पर ऊ अलग अहैं। उनकर बैट स्विंग बेसबॉल स्टाइल जैसन अहै।”
वापसी करै क दम
बिशॉप कहेन कि वैभव मा मानौ तकनीकी कमी होइ सकत है, लेकिन उनमा वापसी करै क पूरा दम अहै। अपनी गेंदिन से बल्लेबाजिन के दिल मा डर पैदा करै वाले बिशॉप कहेन, “ई कहब बहुत कठिन है कि उनकर कमजोरी का है, काहे से ‘बैक ऑफ लेंथ’ वाली गेंदा जेहिका इस्तेमाल अंडर-19 वर्ल्ड कप अउर सनराइजर्स हैदराबाद के मैच मा उनकर खिलाफ भवा रहा, ओहुमा अगर आप रंचो भर चूकब तौ ऊ गेंद का मैदान के बाहरै भेज देइहें।”
