रॉयल चैलेंजर्स बेंगलुरू अउर गुजरात टाइटंस के बीच बिहस्पतवार क खेलें गय मैच के बाद जेसन होल्डर जउन रजत पाटीदार क कैच लपकें हैं, ओका लइके भारी बखेड़ा मचा अहै। आरसीबी अपने कप्तान के कैच क गलत बतावत अहै अउर होल्डर का बेईमानी के कटघरे मा खड़ा करत अहै। इहै बीच गुजरात क ऑलराउंडर होल्डर एक अचरज भरा बयान दिहिन अहै।
आठवें ओवर क चौथी गेंद पर होल्डर डीप स्क्वायर लेग पर आरसीबी के कप्तान पाटीदार क कैच लपकें। इ कैच के बाद बिबाद तबै शुरू भा जब होल्डर जमीन पर गिरे अउर गेंद थोरिक जमीन से छुअत देखात रही। वहीं जब होल्डर उठें तौ गेंद जमीन पर लाग रही, जउन रिप्ले मा साफै-साफ दिखत रहा। इहै बात लइके आरसीबी ऐतराज जताइस, बाकिर पाटीदार का फिरौ आउटै दइ दीन गवा।
होल्डर कहिन अपनी बात
इ मैच मा होल्डर गुजरात का जितावै मा बड़ी भूमिका निभाइन। उ चार ओवर मा 29 रन दइके दुई विकेट झटकें। अपने शानदार खेल के ताईं होल्डर का ‘प्लेयर ऑफ द मैच’ चुना गवा। मैच खतम भये पर होल्डर कहिन, “हम रबाडा का आवत देखि लिहे रहेन। हम बस यही चाहत रहेन कि उनसे टकराइ न जाई। हम बगल से उनका देखत रहेन, मुला उ हमका रोकैं बदे काफी दूरि रहे। जइसै गेंद आई, हम ओका लपक लिहेन। मौका क फायदा उठाइके हम बहुतै खुश अही।”
होल्डर अंत मा 10 गेंद मा 12 रन क पारी खेलिन। उ बल्ला से भी तूफानी अंदाज मा रन बनावै क दम राखत हैं अउर फ्रेंचाइजी उनसे इहै उम्मीद करति अहै। अपनी बल्लेबाजी क लइके होल्डर कहिन, “जइसन इ फ्रेंचाइजी क तरीका अहै, ओमा आपकौ चौकन्ना रहब जरूरी अहै। इ सही बखत पर नीक खेल दिखावै क बात अहै।”
अइसन रहा मैच क हाल
इ मैच मा आरसीबी के बल्लेबाजी उ कमाल नाहीं कइ पाइन जउन उ इ सीजन मा करत आ रहेन। उनका धुआंधार बैटिंग लाइनअप 19.5 ओवर मा 155 रन पर ढेर होइ गवा। उनके कउनौ बल्लेबाज अर्धशतक (पचासा) नाहीं लगाइ पाइन। इ आसान से लक्ष्य का गुजरात 15.5 ओवर मा छै विकेट गँवाइके हासिल कइ लीहिस।
