गुजरात क जीत के बादौ प्वाइंट्स टेबल मा जादा बदलाव नाहीं आवा, आरसीबी क नंबर-1 बनै क सपना टूटा।
गुजरात टाइटंस गुरुवार का अपने घरे अहमदाबाद के नरेंद्र मोदी स्टेडियम मा रॉयल चैलेंजर्स बेंगलुरू का चार विकेट से हराइ दिहिस। एके साथै गुजरात पिछले मैच मा मिली हार क बदलाउ लै लिहिस। आरसीबी के दिहा गा 156 रन क टारगेट गुजरात बड़े आराम से पूरा कइ लिहिस। ई मैच के बाद प्वाइंट्स टेबल मा जादा कुछ असर नाहीं पड़ा अहै। दुइनो टीम अपनी-अपनी जगह पर टिकी अहैं।
मुला, आरसीबी के पास जे नंबर-1 बनै क मौका रहा, उ हाथ से निकर गवा। ई हार के बादौ आरसीबी दूसरे नंबर परै काबिज अहै। ओकरे नौ मैचन मा छह जीत अउर एक हार के बाद 12 अंक अहैं। जउ उ गुजरात का हराइ देती, तौ पंजाब किंग्स का हटाइके पहिले नंबर पर पहुंच जाती। पंजाब के आठ मैचन मा छह जीत अउर एक हार के बाद 13 अंक अहैं। ओकर एक मैच पानी बरसै के नाते रद होइ गवा रहा।
सनराइजर्स हैदराबाद की टीम नौ मैचन मा छह जीत अउर तीन हार से 12 अंक लै के तीसरे नंबर पर अहै। आरसीबी नेट रन रेट मा आगे अहै, तेही से उ दूसरे नंबर पर अहै। उहईं राजस्थान केउ 12 अंक अहैं। ओकर नेट रन रेट आरसीबी अउर हैदराबाद से खराब अहै, तेही से उ चौथे नंबर पर अहै। मैच खेलै अउर हार-जीत के मामले मा उ दुइनो टीमन के बराबरै अहै।
आरसीबी का हरावै के बाद गुजरात के 10 अंक होइ गये अहैं, जे ओका नौ मैचन मा पांच जीत अउर चार हार के बाद मिले अहैं। उ पहिलेउ पांचवें नंबर पर रही अउर अबहूँ उहई नंबर पर अहै।
आखिरी पांच मा अहैं ई टीमें
पांच बार क चैंपियन चेन्नई सुपर किंग्स आठ मैचन मा तीन जीत अउर पांच हार से छह अंक लै के छठवें नंबर पर अहै। दिल्ली कैपिटल्स क हालउ चेन्नई जइसन अहै अउर उ सातवें नंबर पर अहै। कोलकाता नाइट राइडर्स आठ मैचन मा दू जीत अउर पांच हार के बाद पांच अंक लै के आठवें नंबर पर अहै। मुंबई के हिस्सौ आठ मैचन मा से छह हार अउर दू जीत आई अहै, जेसे ओकरे चार अंक अहैं अउर उ नौवें नंबर पर अहै। लखनऊ सुपर जायंट्स क आंकड़ाउ मुंबई जइसन अहै, मुला नेट रन रेट मा उ पाछे अहै, तेही से उ सब से आखिरी यानी 10वें नंबर पर अहै।
