आज से गैस सिलिंडर के बुकिंग अउर डिलीवरी के नियम बदलि गय अहैं। 1 मई 2026 से पूरे देस मा एलपीजी गैस सिलिंडर के बुकिंग अउर डिलीवरी के नियमन मा बड़ा बदलाव लागू कीन जाइ रहा अहै। अब सिलिंडर की डिलीवरी तबै होइ जब ग्राहक डिलीवरी करै वाले एजेंट का ओटीपी (डिलीवरी ऑथेंटिकेशन कोड – डीएसी) बताइ देिहइँ। बिना ओटीपी के अब सिलिंडर नाहीं मिली।
ओटीपी वाला नियम भवा जरूरी: 1 मई से ओटीपी आधारित डिलीवरी सिस्टम एकदम जरूरी करि दीन गा अहै। जबै आप रिफिल बुक करिहौ, तौ आपकै रजिस्टर मोबाइल नंबर पर एक ओटीपी आई। डिलीवरी के समय ई ओटीपी डिलीवरी बॉय का बताउब बहुतै जरूरी अहै। अब खाली ब्लू बुक या रसीद देखाय के सिलिंडर नाहीं लीन जाइ सकी। ई व्यवस्था का मकसद सब्सिडी वाली गैस का गलत इस्तेमाल अउर हेराफेरी रोकब अहै।
बुकिंग के बीच के समय मा बदलाव: सहर मा दू बुकिंग के बीच मा जउन 21 दिन के गैप रहा, ओका बढ़ाय के अब 25 दिन करि दीन गा अहै। गांवन मा ई गैप 45 दिन तक होइ सकत अहै। अगर ई समय से पहिले बुकिंग करै के कोसिस कीन गय, तौ सिस्टम अपने आप ओका ब्लॉक करि देई।
हर महीना मिली नया अपडेट: एलपीजी कंपनी (IOCL, BPCL, HPCL) अब हर महीना की 1 तारीख का नियमन अउर दामन मा बदलाव के जानकारी देिहइँ। येहिकारे 1 मई का गैस के दाम मा बदलाव होइ सकत अहै।
ग्राहकन के बरे सलाह: हमेशा आपन रजिस्टर मोबाइल नंबर चालू रखौ। बुकिंग करै से पहिले दिनन के गैप जांचि लेउ। डिलीवरी के समय ओटीपी पहिले से तैयार रखौ। उज्जवला कनेक्शन वालेन का आधार ई-केवाईसी (eKYC) अपडेट रखै का कहा गा अहै।
ई बदलाव गैस के जमाखोरी रोकै, सप्लाई का नीक बनावै अउर डिजिटल पारदर्शिता बढ़ावै के ताईं कीन जाइ रहे अहैं। लाखन घरेलू ग्राहकन का अब ई नये नियमन का मानब परी।
