अमेरिकी राष्ट्रपति डोनल्ड ट्रंप का लेके एक बड़ी खबरि सामने आवत अहै। असल मा 2026 के नोबेल शांति पुरस्कार बदे ट्रंप नामांकित उम्मीदवारन मा शामिल होइ सकत हें। नॉर्वेजियन नोबेल कमिटी के सचिव क्रिस्टियन बर्ग हार्पविकेन बृहस्पत क बताइन कि ई साल पुरस्कार बदे कुल 287 उम्मीदवारन क लिस्ट तैयार कीन गइ अहै, जेमों 208 मनई अउर 79 संगठन शामिल हें।
हार्पविकेन कहिन कि ट्रंप ई उम्मीदवारन मा से एक होइ सकत हें, मुला कमेटी कवनो भी नाँव क आधिकारिक पुष्टि नाहीं करति अहै। नामांकन क गोपनियता 50 साल तक बनी रहत अहै।
ई देसन भेजिन ट्रंप क नाँव
रॉयटर्स क रिपोर्ट के मुताबिक, कंबोडिया, इजरायल अउर पाकिस्तान के नेता ट्रंप का ई पुरस्कार बदे नामांकित कीहिन अहै। कमेटी के सचिव ई साफ कहिन कि नामांकन क मतलब ई नाहीं अहै कि कमेटी उनके समर्थन मा अहै। नया पद सम्हारै के बाद हार्पविकेन कहिन कि दुनिया मा बढ़त लड़ाई-झगड़ा अउर देसन के बीच दवाब के बावजूद नोबेल शांति पुरस्कार क अहमियत पहिले से ढेर होइ गइ अहै। अइसन समय मा शांति पुरस्कार अउर जरूरी होइ जात अहै।
पिछले साल कीन रहा दावा
ट्रंप पिछलके साल भी 2025 के नोबेल शांति पुरस्कार क दावेदारन मा से एक रहेन। ऊ दावा कीहिन रहा कि कई अंतरराष्ट्रीय जुद्धन का सुलझावै मा उनकर बड़ा हाथ रहा। पिछले साल ई पुरस्कार वेनेजुएला क विपक्षी नेता मारिया कोरिना माचाडो का लोकतंत्र अउर शांतिपूर्ण ढंग से बदलाव लावै के कोसिस बदे दीन ग रहा।
ई साल क लिस्ट मा कई नया नाँव शामिल अहैं। चर्चा मा रहे अउर नावन मा रूसी विपक्षी नेता यूलिया नावल्नाया, पोप लियो अउर सूडान क स्वयंसेवी सहायता समूह जइसन संस्था शामिल हें।
9 अक्टूबर क होइ नोबेल क एलान
2026 के नोबेल शांति पुरस्कार जीतै वाले क नाँव क एलान 9 अक्टूबर क कीन जाई, जबकि पुरस्कार देवे क कार्यक्रम 10 दिसंबर क होइ। दुनिया भर के हजारों काबिल मनई, जेमों सांसद, यूनिवर्सिटी के प्रोफेसर अउर पहिले के नोबेल विजेता शामिल हें, ऊ नाँव भेज सकत हें।
