NCB क बड़ी कामयाबी, मुंबई मा 1745 करोड़ क कोकेन बरामद करि के अंतरराष्ट्रीय तस्करन क कमर तोड़ी गय।
नारकोटिक्स कंट्रोल ब्यूरो (एनसीबी) एक्ठु बड़का अंतरराष्ट्रीय ड्रग्स रैकेट क भंडाफोड़ कीहे अहै। एहि कार्रवाई मा मुंबई मा करीब 1,745 करोड़ रुपिया क 349 किलोग्राम हाई-ग्रेड कोकेन धरी गय अहै। ई जब्ती एहि बरे बहुतै खास अहै काहे से पूरे देस मा हर साल औसतन 200-300 किलोग्राम कोकेन ही पकड़ी जात अहै।
केंद्रीय गृह मंत्री अमित शाह जी ‘एक्स’ पर एहि जब्ती क जानकारी देत भये कहेन कि ई ‘जमीनी स्तर से ऊंचे स्तर तक’ (बाटम-टू-टॉप) वाली रणनीति क एकठु नीक उदाहरण अहै, जइमा एजेंसी एकठु छोटहन खेप क पता लगाय के एक्ठु बड़का नेटवर्क का तहस-नहस कइ दिहिस। एहि ऐतिहासिक सफलता बरे उ एनसीबी टीम का हिया से बधाई दिहन। साथै कहेन कि हम नशा क गिरोह का बेरहमी से कुचलै बरे पक्का मन बनाय अही।
गृह मंत्रालय एक्ठु बयान मा बतायस कि ‘ऑपरेशन व्हाइट स्ट्राइक’ के तहत एनसीबी का ई सफलता छय महीना से बेसी समय तक अंदरुनी खबर जुटावे अउर निगरानी रखै क नतीजा अहै। एकदम पक्की अउर भरोसेमंद जानकारी के आधार पर एनसीबी क कइयौ टीमन कलंबोली-भिवंडी कॉरिडोर (नवी मुंबई-ठाणे इलाका) मा एक साथै छापा मारिन। एसे कोकेन क सप्लाई करै वाले एक्ठु बहुतै बड़ संगठित अंतरराष्ट्रीय गिरोह क पोल खुलि गय।
एहि आपरेशन के पहिले चरण मा एनसीबी के अफिसरन नवी मुंबई के कलंबोली मा मौजूद केडब्ल्यूसी वेयरहाउसिंग कांप्लेक्स के लगे एकठु मारुति सुजुकी सुपर कैरी गाड़ी (MH-03-DV-3803) का रोकिन। तलाशी लीन गय तव ओमा कोकेन के 136 पैकेट मिले, अउर हर पैकेट क वजन करीब एक किलो रहा। ई पैकेट गत्ते के डिब्बन मा धरे रहे, जइमा कोकेन का क्रिकेट पैड अउर ग्लव्स के बीच मा लुकाय के रखा गवा रहा। मौका से गाड़ी चलावे वाले ड्राइवर का धरि लीन गवा।
पूछताछ मा ऊ बतायस कि भिवंडी (जौन गोदामन क बड़का केंद्र अहै) मा कोकेन क एक्ठु अउर खेप लुकाय के राखी गय अहै। मंत्रालय बतायस कि एनसीबी की टीम फुरती देखाय के भिवंडी (जिला ठाणे) के रेहनाल गांव मा लक्ष्मण परिसर के एकठु गोदाम मा दूसरे चरण क आपरेशन चलाइस। एहि बीच कोकेन के 213 पैकेट अउर बरामद भये।
जांच मा पता चला कि कोकेन का बाहर से मंगाई गय मशीनरी के भीतर लुकाय के रखा गवा रहा। ओकर हर पैकेट का पालीथीन के नौ परतन मा लपेटा गवा रहा, जइमा एक परत करिया रंग के चिकने पदार्थ के भी रही। एनसीबी क कहब अहै कि भिवंडी के गोदामन क इस्तेमाल ई साफ बतावत अहै कि कोकेन क तस्करी बरे बहुतै सोंच-समझि के सप्लाई चेन क उपयोग कीन जात रहा। एमा मशीनरी मंगाउब, गोदामन मा पैकेट लुकाउब अउर फिर हुंवा से निकालि के आगे भेजव शामिल रहा।
एनसीबी अब एहि रैकेट के सरगना क तलाश मा अहै अउर पइसा लगावे वालन अउर माल पावे वालन का धरे बरे गहिरी जांच करति अहै। ई कार्रवाई अइसन समय मा भइ अहै जब कुछु दिन पहिले ही ड्रग्स तस्कर अउर अंतरराष्ट्रीय आतंकी दाऊद इब्राहिम के करीबी सलीम डोला का तुर्किये से भारत लवावा गवा अहै।
