सरकार कहत है कि देस मा घरेलू एलपीजी के सप्लाई एकदम नीक बनी अहै। बियफै के 49.8 लाख एलपीजी सिलिंडर बाँटे गये, जबकि 41.6 लाख सिलिंडर के नई बुकिंग भई। पच्छिम एसिया मा जो संकट चलत है, ओकरे वजह से भले सप्लाई चैन मा थोड़का अड़चन आई है, मुला कउनो वितरण केंद्र मा गैस के कमी नाहीं अहै। ऑनलाइन घरेलू एलपीजी सिलिंडर के बुकिंग 98 फीसदी तक बढ़ि गई अहै।
एलपीजी के कालाबाजारी रोकइ बरे देशभर मा छापामारी
एजेन्सी स्तर पर कउनो भी गड़बड़ी रोकइ बरे ग्राहकन के मोबाइल नंबर पर ‘आथेंटिकेशन कोड बेस्ड डिलीवरी’ (डीएसी) लगभग 93 फीसदी तक पहुँचि गई अहै। पेट्रोलियम अउर प्राकृतिक गैस मंत्रालय बताइस कि एलपीजी के जमाखोरी अउर कालाबाजारी रोकइ बरे देस भर मा छापा मारइ का काम जारी है। बियफै के देस भर मा 2,300 से बेसी छापा मारे गये। सरकारी तेल कम्पनिन 342 एलपीजी एजेंसीन पर जुरमाना लगाइन अउर 73 जने के लाइसेंस रद्द कइ दीन।
मंत्रालय बताइस कि अबहीं तक 43,200 से बेसी पीएनजी कनेक्शन वाले लोगन आपन एलपीजी सिलिंडर वापस कइ दीन अहैं। मंत्रालय तेल के कउनो कमी न होय, एकरे बरे जरूरी कदम उठावत अहै। साथै लोगन से निहोरा कीन है कि कउनो अफ़वाह मा न आवें अउर घबराय के तेल न कीनें। पेट्रोल पम्प पर पेट्रोल अउर डीजल का पूरा स्टॉक अहै।
एअर इंडिया एक्सप्रेस खाड़ी देसन बरे उड़ान फिर शुरू कीस
एएनआई के खबर के मुताबिक, एअर इंडिया एक्सप्रेस कतर अउर बहरीन बरे हवाई जहाज के उड़ान फिर से शुरू करइ का एलान कीस है। साथै 30 अप्रैल से यूएई, ओमान अउर सऊदी अरब बरे अउर बेसी उड़ानन के सुरुआत कीन गई है। ई उड़ानें देस के बड़े सहरन अउर हवाई अड्डन से शुरू भई अहैं, जेहमा दिल्ली, अमृतसर, बेंगलुरु, हैदराबाद, जयपुर, कोच्चि, कोझीकोड, कन्नूर, लखनऊ, मंगलुरु, मुंबई, तिरुचिरापल्ली, तिरुअनंतपुरम अउर बनारस सामिल हैं।
एअर इंडिया एक्सप्रेस अल ऐन, अबू धाबी, दुबई, रस अल खैमाह, शारजाह, जेद्दाह, रियाद अउर मस्कट बरे आपन उड़ान चालू राखी। टाटा ग्रुप के एअर इंडिया दक्खिन, दक्खिन-पूरब अउर पच्छिम एसिया मा रोज 500 से बेसी उड़ान संचालित करत है।
पच्छिम एसिया मा फंसे मल्लाह का वापस लावै के माँग
‘फॉरवर्ड सीमेन यूनियन ऑफ इंडिया’ (एफएसयूआई) सुकरवार के केंद्र सरकार से निहोरा कीस है कि पच्छिम एसिया मा फंसे भारतीय मल्लाह का वापस लावै बरे काम तेज कीन जाय। ई इलाका मा ई समय अमेरिका-इजरायल सेना अउर ईरान के बीच जुद्ध चलत है। एही बीच, कई हफ्ता तक परेशानी झेलइ के बाद लौटे वाले लोगन का एक नया जत्था मुंबई पहुँचि गवा है।
