रियान पराग के ‘धुआं उड़ावे’ पर कुमार संगकारा तोड़ेन चुप्पी, टीम के साख पर कही ई बड़ी बात

राजस्थान रॉयल्स के मुख्य कोच कुमार संगकारा कहेन कि मैदान से बाहर जौन दूई घटना भई अहैं, ओकरे बरे कप्तान रियान पराग अउर सहयोगी स्टाफ के एक सदस्य पर जौन जुर्माना लगावा गा है, ओसे टीम के साख पर बुर असर पड़त है। पराग पर पंजाब किंग्स के खिलाफ मैच के दौरान गुरुवार का ड्रेसिंग रूम मा ‘वेपिंग’ (धुआं उड़ावे) करे खातिर मैच फीस के 25 फीसदी जुर्माना ठोंका गवा है। उन पर खेल के इज्जत खराब करे के दोषी पावा गवा। ओसे पहिले टीम मैनेजर रोमी भिंडर पर डगआउट मा फोन चलावे के नियम तोड़े खातिर एक लाख रुपिया के जुर्माना लगावा गवा रहा।

नीक असर नाहीं पड़त

दिल्ली कैपिटल्स के खिलाफ मैच से पहिले संगकारा कहेन कि, “मोका लागत है कि अइसन कउनो भी बिवाद से टीम पर कउनो नीक असर नाहीं पड़त है, चाहे उ कउनो भी तरह के बात होय। मैं बस एतने कहि सकत हौं कि इन दूनों बिवाद पर बीसीसीआई अउर फ्रेंचाइजी का ध्यान देवे का चाहत रहा।” उ आगे कहेन कि, “आप हमेशा एक पॉजिटिव अउर हेल्थी कल्चर चाहित है। हमार आपन कुछ उसूल अहैं जेकर पालन हमका करे का परत है। हम अपने खिलाड़ीन का बार-बार ई बात चेतावत रहित है ताकि उ फ्रेंचाइजी, हमार कल्चर अउर उसूलन के प्रति जिम्मेदार रहैं।”

राजस्थान का मिली हार

वहीं मैच के बात कीन जाय तौ राजस्थान रॉयल्स का दिल्ली कैपिटल्स के हाथे हार झेले का पड़ी है। जयपुर मा खेले गये मैच मा राजस्थान पहिले बैटिंग करे के फैसला कीस अउर 6 विकेट खोई के 225 रन बनाइस। दिल्ली ई लक्ष्य 19.1 ओवर मा खाली 3 विकेट खोई के हासिल कइ लिहिस। राजस्थान बरे पराग फिर से फॉर्म मा लौटत भये 50 गेना मा 8 चौका अउर 5 छक्का के मदद से 90 रनन के पारी खेलिन। वहीं दिल्ली बरे केएल राहुल 75 अउर पथुम निसंका 62 रन बना के मैच अपने नाम कइ लिहिन। राहुल 40 गेना मा 6 चौका अउर 5 छक्का मारिन, तौ निसंका 33 गेना मा 6 चौका अउर 3 छक्का लगा के 62 रन बनाइन।