आदित्य धर के निर्देशन मा बनी ‘धुरंधर’ अउर ‘धुरंधर 2’ बॉक्स ऑफिस पर कमाई के मामला मा इतिहास रच दिहिन हैं। ई फिल्म भारत कय सबसे जादा कमाई करे वाली फिल्म बनि गय अउर पूरी दुनिया मा रिकॉर्डतोड़ पैसा बटोरत है। मुला, फिल्म का कामयाबी के साथै-साथै आलोचना भी झेले का परी। ई फिल्म का प्रोपेगेंडा बतावा गवा। सोशल मीडिया पर भी फिल्म कय खूब निंदा भई। अब मसहूर स्क्रीनप्ले राइटर जावेद अख्तर ‘धुरंधर’ का प्रोपेगेंडा कहे जाय पर आपन प्रतिक्रिया दिहिन हैं।
‘धुरंधर’ का प्रोपेगेंडा बतावे पर जावेद कय जबाब
जावेद अख्तर हाल ही मा कोलकाता मा एक ठो अवॉर्ड फंक्शन मा शामिल भये रहेन। उहाँ उनसे ‘धुरंधर’ जइसन प्रोपेगेंडा फिल्मन के बारे मा उनकर राय पूछी गयी। ‘हिंदुस्तान टाइम्स’ के मुताबिक, ई प्रोग्राम मा जावेद अख्तर कहिन कि उनका ‘धुरंधर’ पसंद आई। उ बोलेन- “मोका नाहीं मालूम कि प्रोपेगेंडा फिल्मन से आप कय का मतलब है। मोका ‘धुरंधर’ बहुतै नीक लागी, ई एक ठो बेहतरीन फिल्म रही। मोका दूसरी फिल्म के मुकाबले पहली वाली जादा पसंद आई।”
जावेद अख्तर कीन ‘धुरंधर’ कय बचाव
जावेद अख्तर ‘धुरंधर’ फिल्म कय बचाव करत कहिन, “हर कहानी कय कउनो न कउनो स्टैंड (पक्ष) होत है, मुला का ई प्रोपेगेंडा बनि जात है काहे से कहानी दरसकन के एक हिस्से का सही नाहीं लागत? हर मनई का आपन विचार फैलावे कय हक है। प्रोपेगेंडा फिल्मन मा गलत का है? हर फिल्म बनावे वाले कय काम सच देखाउब है। चाहे कउनो फिल्म कय कहानी परियन की कहानी (फेयरी टेल) पर बनी होय, मुला ओहू मा कउनो न कउनो विचारधारा तौ होइबे करी।”
बॉक्स ऑफिस पर ‘धुरंधर’ कय जलवा
‘धुरंधर’ अउर ‘धुरंधर 2’ चार महीना के भीतर सिनेमाघरन मा रिलीज भई रहीं। पहली फिल्म जहाँ पूरी दुनिया मा 1300 करोड़ रुपये से जादा कय कारोबार कीस, वहीं दूसरी फिल्म 2000 करोड़ के लगे पहुँचय वाली है। ई फिल्म वर्ल्डवाइड ‘दंगल’ कय रिकॉर्ड तोड़े वाली है।
