मुख्यमंत्री योगी आदित्यनाथ मंगल क सबेरे गोरखनाथ मंदिर मा लाग जनता दरबार मा लोगन से भेंट कइके उनकर समस्या सुनिन। उ आए हुए लोगन का भरोसा देवावत कहेन कि, “चिंता जिन करौ, सरकार हर समस्या क पक्का हल निकारिहे।” ई बीच मुख्यमंत्री अधिकारिन का हुकुम दिहिन कि जनता क परेसानी पर तुरत संवेदनशीलता देखावत साफ-सुथरा निस्तारण पक्का कीन जाय।
मंगल क सबेरे गोरखनाथ मंदिर मा लाग जनता दरबार मा सीएम योगी लगभग 200 मनइन से मिलिन। महंत दिग्विजयनाथ स्मृति भवन के सामनें कुर्सी पर बैठल मनइन तक मुख्यमंत्री खुदय गइन अउर उनकर बात सुनिन। उ लोगन क अरजी लिहिन अउर लगे ठाढ़ अफ्सरन का समस्या सुलझावे बरे जरूरी हिदायत दिहिन। अलग-अलग मामला से जुड़ी समस्या निबटावे बरे उ प्रशासन अउर पुलिस अधिकारिन का अरजी सउंप के निर्देशित कीन कि सब समस्या क निस्तारण समय से अउर बिना कउनो पक्षपात के होय के चाही।
जमीन कब्जा करे क सिकायत पर मुख्यमंत्री प्रशासन अउर पुलिस अधिकारिन से कहेन कि जउ कउनो दबंग केहू क जमीन पर जबरदस्ती कब्जा करत होय, तौ ओकरे खिलाफ कड़ी कानूनी काररवाई कीन जाय। जनता दरबार मा हर बार की नइईं ई बारौ कुछ लोग इलाज बरे रुपिया-पइसा क मदद मांगय आए रहेन। मुख्यमंत्री उनका धीर धरावत कहेन कि रुपिया क कमी से केहू क इलाज नाहीं रुकी। उ अफ्सरन का हुकुम दिहिन कि जउन भी जरूरतमंद अहैं, प्रशासन उनका बड़े अस्पताल मा इलाज क खरच (एस्टीमेट) जल्दी से बनवाइके देय। एस्टीमेट मिलते ही सरकार तुरत रुपिया देई।
जनता दरबार मा कुछ मेहरारुन के साथे उनका लइका भी आए रहेन। मुख्यमंत्री इन लइकन का दुलारिन अउर चाकलेट दइके असीरवाद दिहिन।
गौसाला मा गैया का खवायेन गुड़
गोरखनाथ मंदिर मा ठहराव के दौरान मंगल क सबेरे मुख्यमंत्री योगी आदित्यनाथ क दिनचर्या पुरान तरीके क रही। उ सबेरे-सबेरे गोरखनाथ मंदिर मा सिवावतार गुरु गोरखनाथ क पूजा-पाठ कीन अउर अपने गुरु ब्रह्मलीन महंत अवेद्यनाथ क समाधि पर जाइके माथा टेकेन। सीएम योगी जब भी गोरखनाथ मंदिर मा रहत अहैं, तौ गउ-सेवा उनकर रोज क काम मा सामिल रहत है। मंगल क सबेरे उ मंदिर क चक्कर लगावत गौसाला पहुंचिन अउर हुंवा कुछ देर बिताइन। गौसाला मा मुख्यमंत्री गैया क माथा सहराइन, उनका खूब पुचकारिन अउर अपने हाथन से गुड़ खवाइन।
