स्पेस एक्स के मालिक एलन मस्क, बेंगलुरु के अंतरिक्ष स्टार्टअप ‘गैलेक्सीआई’ का ‘मिशन दृष्टि’ सेटेलाइट के सही-सलामत लॉन्चिंग पर ढेर सारी बधाई दिहिन। प्रधानमंत्री नरेन्द्र मोदी जब ‘मिशन दृष्टि’ के सफल लॉन्च होय पर गैलेक्सीआई का बधाई देवै वाला पोस्ट साझा कीन, त उहै पर अपनी प्रतिक्रिया देत मस्क मंगलवार का ‘एक्स’ (पहिले क ट्विटर) पर लिखिन— “बधाई हो”। पीएम मोदी रविवार का एक्ठु पोस्ट मा ई लॉन्चिंग का भारत के अंतरिक्ष सफ़र मा एक्ठु बहुतै बड़ी उपलब्धि अउर देस मा बढ़त नवाचार (Innovation) क जीती-जागती मिसाल बताइन रहा।
प्रधानमंत्री कहिन कि ई मिशन देस बनावै अउर तकनीकी तरक्की बरे भारत के नौजवानन के लगन अउर जोस का देखावत अहै।
पीएम मोदी का कहिन रहा?
प्रधानमंत्री कहिन, “गैलेक्सी क मिशन दृष्टि हमार अंतरिक्ष यात्रा मा एक्ठु बहुतै बड़ी कामयाबी आय। दुनिया क पहिला ‘ऑप्टोसार’ सेटेलाइट अउर भारत मा बनल सबते बड़ा निजी सेटेलाइट क सफल लॉन्चिंग, नवाचार अउर राष्ट्र निर्माण बरे हमार नौजवानन के जोस क परमान आय।” बताइ दी कि ई सेटेलाइट का इतवार के दिन कैलिफोर्निया से स्पेसएक्स के फाल्कन-9 राकेट से छोड़ गा रहा।
का अहै ‘ऑप्टोसार’ तकनीक?
जेते पुराने ढंग के सेटेलाइट होत हईं, उ सब अक्सर अंतरिक्ष से धरती क फोटो खींचै बरे दूई मुख्य तरीका मा से कउनो एक पर निर्भर रहत हईं। ‘ऑप्टिकल कैमरा’ त सादा डिजिटल कैमरा नियर काम करत हईं, जेमा रंग-रूप अउर फोटो क बारीकी एकदम साफ-साफ लखात अहै। मुला, जब बदरी होय, धुआं छावा होय या रात क अन्हियार होय, त ई कैमरा फेल होय जात हईं।
ऊहैं दूसर ओर, ‘सिंथेटिक एपर्चर रडार’ (SAR) सेटेलाइट रडार क सिग्नल भेजत हईं, जे ज़मीन से टकराइ के वापस लौटत हईं। ई बदरी, बरखा अउर अन्हियार मा भी देखि सकत हईं अउर रात-दिन काम करि सकत हईं। मुला ई करिआ-सफ़ेद रडार वाली फोटो देखै मा थोड़ी अजीब लाग सकत हईं अउर बिना कउनो मदद के ई फोटो क समझब हर मनई बरे मुस्किल होत अहै। ‘ऑप्टोसार’ तकनीक मा ई दुनहु खूबियन का एक्कै सेटेलाइट मा मिलाइ दीन गवा अहै।
