समझौता भा तौ खुलि जाई होर्मुज… ईरान-अमरिका के बीचै जल्दीय होई डील

पच्छिम एसिया मा लड़ाई-झगड़ा अउर खिंचाव खतम करै बरे अमरिका अउर ईरान एकठु थोरे समै वाले समझौते के एकदम नगिचे पहुँचि गय हइँ। मनई बतावत हइँ कि दूनों देस कौनों बड़हन सांति समझौता के बजाय एकठु कामचलाऊ समझौता पर गौर करत हइँ, जेकर मकसद हाल-फिलहाल मा जुद्ध रोकब अउर होर्मुज स्ट्रेट मा सुथरापन लाउब हइ। हालांकि ईरान के परमाणु कार्यक्रम अउर पच्छिम एसिया मा ओकर दबदबा जइसन खास अउर बिवादित मुद्दैं अबहिन सुलझि नाहीं पाईं।

अमरिका-ईरान थोरे समै वाले समझौते के नगिचे

अधिकारिन के मुताबिक, जउं सुरुआती समझौता पर बात बनि जाई तौ ओकरे बाद बड़े समझौता बरे 30 दिनन तक लंबी बातचीति सुरु होइ सकत हइ। समझौता अउर होर्मुज खुलै की आस मा बइस्पत का दुनिया भर के शेयर बाजार रिकार्ड ऊँचाई पर पहुँचि गय, जबकि कच्चा तेल गिरिके 97 डालर पर आइ गवा। ओहर, इजरायल अउर लेबनान मा जुद्ध विराम आगे बढ़ावै बरे 14-15 मई का वाशिंगटन मा बइठक करिहैं।

मानल जात हइ कि ईरान अमरिका के 14 सूत्रीय सांति प्रस्ताव का देखत-परखत हइ अउर जल्दीय पाकिस्तान के रस्ता आपन जबाब भेज सकत हइ। हालांकि एकरे बरे कौनों पक्का समै नाहीं तय कीन गा हइ, मुला पाकिस्तानी बीच-बिचउवा मनइन का कहब हइ कि बइस्पत का ईरान कइत से जबाब आइ सकत हइ। ओहर, ईरान के संसद के एक सदस्य अल जजीरा से कहेन कि तेहरान जल्दीय आपन सरकारी जबाब भेजी। अमरिकी रास्ट्रपति डोनाल्ड ट्रंप भी समझौता का लेके नीक संकेत दीन्हे हइँ। येही बीच, अमरिका के बाणिज्य मंत्रालय बइस्पत का ईरान पर नये किसिम के पाबंदी लगावै की जानकारी दीहिस। चीनी मीडिया काईजिन की रिपोर्ट के हिसाब से, सुमार का होर्मुज मा एकठु चीनी तेल टैंकर पर हमला भा रहा। हालांकि, कौनों नुकसान की खबर नाहीं हइ।

अस्थायी समझौता मा कई ठु बड़े मुद्दैं अबहिन बाहरे रहिहैं

अमरिकी मीडिया एक्सियोस के मुताबिक, जउन समझौता तइयार कीन गा हइ, ओमा ईरान कम से कम 12 सालन तक यूरेनियम संवर्धन रोकै अउर परमाणु हथियार ना बनावै पर राजी होइ सकत हइ। एकरे बदले अमरिका ईरान पर लाग कुछ पाबंदी हटाइ अउर बिदेसी बैंकन मा जप्त अरबन डालर के ईरानी फंड जारी करै का तइयार हइ।

प्रस्ताव मा ई भी कहा गवा हइ कि दूनों देस दसखत के 30 दिनन के भीतर होर्मुज स्ट्रेट मा लाग अपनी-अपनी नाकेबंदी खतम करिहैं अउर ई खास समुद्री रस्ता का फिर से खोलि दइहैं। जउं दूनों कइत के लोग सुरुआती समझौता पर मानि जात हइँ तौ बड़हन समझौता बरे 30 दिनन की लंबी बातचीति सुरु होई। अमरिका कइत से बातचीति का अगुवा ट्रंप के दूत स्टीव विटकाफ अउर दामाद जेरेड कुशनर करिहैं।

होन वाले बड़े समझौता मा अमरिका अउर ईरान कइत से होर्मुज मा लाग नाकेबंदी खतम करब, अमरिकी पाबंदी हटाउब अउर ईरानी फंड जारी करब सामिल होइ सकत हइ। एकरे अलावा संयुक्त रास्ट्र परमाणु निगरानी एजेंसी की देख-रेख मा ईरान के परमाणु कार्यक्रम पर कुछ पाबंदी लगावै का भी प्रस्ताव हइ। मुला मसौदा मा ईरान के मिसाइल कार्यक्रम पर रोक, पच्छिम एसिया मा हिजबुल्ला जइसन साथी गुटन का मदद खतम करब अउर ईरान के लगे मौजूद करीब 400 किलो ऊँच संवर्धित यूरेनियम के भंडार जइसन खास मुद्दैं का जिकर नाहीं कीन गा हइ।

बीच-बिचउवा वाले पाकिस्तान के एकठु बड़े अफसर के मुताबिक, ई समझौता का तीन चरन मा लागू करै की योजना हइ। पहिले चरन मा सरकारी तौर पर जुद्ध विराम लागू कीन जाई। दूसरे चरन मा होर्मुज जलडमरूमध्य से जुड़ल संकट का सुलझावै की कोसिह कीन जाई। तीसरे चरन मा बड़े समझौता बरे 30 दिनन की लंबी बातचीति सुरु होई।