दिग्वेश राठी कि शाहबाज अहमद, ऋषभ पंत कइसे सुलझाइन आखरी ओवर कै उलझन? खुदै बताइन पूरी कहानी

लखनऊ सुपर जायंट्स बृस्पत के दिने अपने घर इकाना स्टेडियम मा खेले गा मैच मा रॉयल चैलेंजर्स बेंगलुरू का नौ रन से हराइ दिहिन। पानी बरसै के नाते ई मैच 19-19 ओवर कै होइ गवा रहा। आखरी ओवर मा जीते बरे आरसीबी का 20 रनन कै जरूरत रही अउर उनके दुइ धाकड़ बल्लेबाज क्रीज पर जमे रहेन। अइसन मा लखनऊ के कप्तान ऋषभ पंत के सामने बड़ी भारी मुश्किल रही। पंत के सामने ई पहेली रही कि उ आखरी ओवर कउन का देइ। उनके पास दुइ विकल्प रहे—पहिला दिग्वेश राठी अउर दूसरा शाहबाज अहमद। पंत बहुत सोच-विचार के बाद राठी का गेंद थमाइन, जे अपनी टीम का जीतवाइ दिहिन।

पंत बताइन भीतर कै बात

आखरी ओवर मा आरसीबी बरे रोमारियो शेफर्ड अउर क्रुणाल पांड्या मैदान मा रहेन अउर दूनो बल्लेबाज बड़े-बड़े शॉट मारै कै दम रखत हन। अइसन मा पंत का ई सब देखत हुए फैसला लेवे के रहा। आखरी ओवर से पहिले पंत अपने दूनो स्पिनरन से बात कीन अउर दूनो जने जिम्मेदारी उठावै का तैयार दिखत रहेन। येसे पंत के बरे अउर मुसीबत खड़ी होइ गई। ई फैसले के बारे मा पंत कहेन, “ई बहुतै मुश्किल फैसला रहा। हम दबाव मा रहेन, मुला साथै-साथ अपने गेंदबाजन पर भरोसा करब जरूरी होत है। शेफर्ड का देखत हुए राठी एकदम सही ‘मेचअप’ रहे। उनका अपने ऊपर पूरा भरोसा रहा अउर उ टीम बरे आपन काम कर दिहिन।”

गेंदबाज कै कीन जमके सराहना

राठी अपने कप्तान के भरोसे का सही साबित कीन अउर खाली 10 रन खरच कीन। पंत ई जीत से बहुतै खुश नजर आएन अउर आपन गेंदबाजी फौज के बारे मा जमके बखान कीन। पंत कहेन, “हमका पता है कि एक टीम के तौर पर हम सब बहुतै मेहनत करित हन। ई सीजन मा हमारी असली ताकत हमारी गेंदबाजी रही है। जिस तरह से हमारे गेंदबाजन मेहनत कीन है उ शानदार है, खास कइके प्रिंस, शमी भाई, राठी, आवेश, अउर मयंक, सब जने।”