दक्षिण-पश्चिम फ्रांस मा एक क्रूज शिप (पानी वाला जहाज) पर पेट मा इंफेक्शन होइ के मामला अगाड़ी आवै के बाद करीब 1700 मुसाफिरन का जहाज पर ही रोक दीन गवा अहै। अधिकारिन के मुताबिक बहुतै मुसाफिरन मा गैस्ट्रोएन्टराइटिस जइसन लच्छन पावा गए हयँ। एम्बिशन नाँव क ई क्रूज शिप 8 औ 9 मई का ब्रिटेन के बेलफास्ट औ लिवरपूल से मुसाफिरन का लइके फ्रांस औ स्पेन की जतरा पर निकरा रहा। फ्रांस के गिरोंद इलाका की स्वास्थ एजेंसी के अनुसार, जहाज पर लगभग 50 मुसाफिरन मा तेज पेट खराब होइब औ उल्टी-दस्त जइसन लच्छन देखा गए।
मुसाफिरन का कमरा मा कीन गवा आइसोलेट
स्वास्थ अधिकारिन बताइन कि लच्छन देखातै बीमार मुसाफिरन क डाक्टरन से जांच करवाई गइ औ उनहीं का उनके कमरा मा आइसोलेशन (अलग) मा रख दीन गवा। बचाव के तौर पर बोर्डो मा मुसाफिरन के उतरे की जोजना अभी रोक दीन गइ अहै। बीमार मुसाफिरन के नमूना (सैंपल) लइके बोर्डो यूनिवर्सिटी अस्पताल के छुआछूत वाली बीमारी वाले विभाग मा जांच बदे भेजे गए हयँ।
92 साल के एक मुसाफिर क मौत
इहै बीच, 10 मई का जहाज पर 92 साल के एक मुसाफिर क मौत भी होइ गइ। हालाँकि क्रूज चलावै वाली कंपनी एंबेसडर क्रूज लाइन साफ कहिस कि मरै वाले मुसाफिर मा पेट की बीमारी के कउनो लच्छन नाहीं रहे। कंपनी बयान जारी कइके कहिस कि मौत क असल कारन क अभी पता नाहीं चलि पावा अहै औ कोरोनर क रिपोर्ट क इंतजार कीन जा रहा अहै। हम मरै वाले के परिवार औ दोस्तन के प्रति गहरी संवेदना जताइत हन।
हंटावायरस से कउनो लेना-देना नाहीं
फ्रांस की क्षेत्रीय स्वास्थ एजेंसी कहिस कि ई घटना क कउनो दूसर क्रूज शिप ‘होंडियस’ पर फैले हंटावायरस संक्रमण से कउनो लेना-देना नाहीं अहै। एंबेसडर क्रूज लाइन ई बात पक्की कीनिस कि 14 दिन की जतरा के दौरान कुछ मुसाफिरन औ क्रू मेम्बरन मा पेट की बीमारी जइसन लच्छन दिखाई परे हयँ।
