क्यूबा देस मा इन दिना ऊर्जा संकट क बदरा मँडराय रहे अहैं। उहाँ क ऊर्जा मंत्री विसेंटे डे ला ओ लेवी ई बात क पुष्टि कीन अहैं कि देस मा ईंधन एकदमै खतम होइ गवा अहै। हालात एतने खराब अहैं कि देस मा डीजल अउर ईंधन क कमी क मारे 22-22 घंटा बिजली काटी जा रही अहै। ई स्थिति अमेरिका-ईरान जुद्ध क वजह से बनी अहै। उहाँ क मनइन का इहैं समय घुप अँधियारे (ब्लैकआउट) क सामना करैं का पड़त अहै। ओही तरफ, अइसन हालात मा देस क राजधानी हवाना सहर मा बड़े पैमाना पर बिरोध-परदरसन भड़क गवा अहै। ढेर सारे परदरसनकारी सड़कन पर उतरि आए अहैं अउर बिगड़त तेल क संकट से हतास होइके “बत्तियां जलाओ” क नारा लगावत अहैं। ई दौरान मनइन बर्तन पीटे क साथै-साथ कूड़ा क ढेर मा आगि लगाइ दिहिन।
सौर ऊर्जा से चल रहा काम
मीडिया रपट क मुताबिक, ऊर्जा मंत्री बताइन कि कच्चा तेल अउर ईंधन तेल दोनौ मा से हमरे पास अब कुछौ नाहीं बचा अहै; इहैं समय हमरे लगे सिरिफ एकै चीज अहै। उ अहै कुअन से निकरै वाली गैस, जेकर पैदावार बढ़ाइ दीन गइ अहै। लेवी देस क हालात का बहुतै तनावपूर्ण बताइन। द गार्डियन क रपट क अनुसार, ऊर्जा अउर खान मंत्री बताइन कि देस भले पछिले दुइ सालन मा 1,300 मेगावाट सौर ऊर्जा क्षमता बढ़ावै क काम कीस अहै, लेकिन ईंधन क लगातार कमी क मारे बिजली ग्रिड डांवाडोल होइ रहा अहै अउर ओकर काम करै क ताकत घट रही अहै। एमा एक बड़ी समस्या बड़े बैटरी भंडारण सिस्टम क कमी अहै।
क्यूबा लगाइस मदद क गुहार
इहैं बीच अमेरिकी राष्ट्रपति डोनाल्ड ट्रंप हवाना पर दबाव अउर बढ़ाइ दिहिन अहैं। उ वेनेजुएला से आवै वाले तेल क जहाज रोोकै अउर दुनिया भर मा टैक्स लगावै क धमकी दै क बाद, ई कसम खाइन अहै कि क्यूबा का अब अउर तेल या पइसा नाहीं मिली। ई टापू क भविष्य क लेके चल रही बातचीत क बीच, ट्रंप कहिन कि उनका क्यूबा का अपने कब्जे मा लै क उम्मीद अहै। ई बयान उ जनवरी मा वेनेजुएला क राष्ट्रपति निकोलस मादुरो का सत्ता से हटावै क कोसिस क बाद दिहिन रहा।
