अमेरिकी राष्ट्रपति डोनल्ड ट्रंप कहिन है कि आईएसआईएस क बड़े नेता अबू-बिलाल का अमेरिकी अउर नाइजीरियाई सेनन मिलिकय मार गिराएन है। ट्रंप अपने सोशल मीडिया प्लेटफॉर्म ‘ट्रुथ सोशल’ पर ई बड़े मिशन क कामयाबी क जानकारी देवत भवा कहिन कि दुनिया क सबसे सक्रिय आतंकियों मा से एक अल-मिनुकी अब खतम होइ गवा है।
ट्रंप बताइन कि अमेरिकी सेना अउर नाइजीरिया क फौज मिलिकय एक बहुतै कठिन अउर बड़े सैन्य अभियान मा ओका मार गिराएन है। अबू-बिलाल अल-मिनुकी आतंकी संगठन इस्लामिक स्टेट (ISIS) मा पूरी दुनिया म दूसरे नंबर क सबसे बड़ा नेता रहा। ट्रंप कहिन कि ई मिशन उनके कहब पर कीन गवा अउर इमा एक बहुतै तगड़ा प्लान अउर पेचीदा मिलिट्री ऑपरेशन सामिल रहा।
अबू-बिलाल अल-मिनुकी अफ्रीका मा लुकै क कोसिस करत रहा, मुला खुफिया जानकारी क वजह से ओकर आवब-जाब अउर ठिकाना क पता लगाय मा मदद मिलि गय।
सोचिस रहा कि अफ्रीका मा लुकाय जाब
ट्रंप पोस्ट मा लिखिन, आज रात, मोर कहब पर अमेरिकी सेना अउर नाइजीरिया क फौज दुनिया क सबसे सक्रिय आतंकी का लड़ाई क मैदान मा खतम करै बरे एक बहुतै सोचि-समझि कय अउर कठिन मिशन का बिना कउनो गलती क पूरा करिन। पूरी दुनिया मा ISIS क नंबर-2 कमांडर, अबू-बिलाल अल-मिनुकी, सोचत रहा कि उ अफ्रीका मा लुकाय सकत है, मुला ओका का पता रहा कि हमरै लगे अइसन जरिया (सोर्स) अहैं जे हमका पल-पल क खबर देत रहत हैं कि उ का करत है।
ट्रंप नाइजीरिया सरकार का दीनिन धन्यवाद
ट्रंप आगे लिखिन, उ अब अफ्रीका क मनइन का डराय न पाई, अउर न ही अमेरिकियों का निशाना बनावै बरे कउनो साजिश रचै मा मदद कर पाई। ओकरे मरे से ISIS क पूरी दुनिया मा चलै वाला काम बहुत कम होइ गवा है। ई अभियान मा साथ देवे बरे नाइजीरिया सरकार क बहुत-बहुत धन्यवाद।
