पाकिस्तान क्रिकेट बोर्ड (PCB) सनीचर का ई बतायस कि आयरलैंड मा होय वाली ट्राई-सीरीज अउर इंग्लैंड अउर वेल्स मा होय वाले आईसीसी विमंस टी20 वर्ल्ड कप 2026 मा फातिमा सना पाकिस्तान महिला टीम क कप्तानी करिहैं। सेलेक्शन कमेटी दुनउ टूर्नामेंट बरे 15 खिलाड़ी वाली टीम क घोषणा कइ दिहे अहै। पाकिस्तान आयरलैंड मा होय वाली ट्राई-सीरीज मा हिस्सा लेई। ई दौरान ओकर भिड़ंत आयरलैंड अउर वेस्टइंडीज से होई। ई ट्राई-सीरीज 28 मई से 4 जून तक डबलिन मा खेली जाई। एहमा पाकिस्तान का चार मैच खेलइ क अहै। ई सीरीज पाकिस्तान समेत तीनउ टीमन का 12 जून से 5 जुलाई तक होय वाले टी20 वर्ल्ड कप बरे तैयारी करइ मा मदद करी।
5 खिलाड़ी पहली बार खेलिहैं
15 खिलाड़िन मा से ऐमान फातिमा, नतालिया परवेज, रमीन शमीम, सायरा जबीन अउर तस्मिया रुबाब पहली बार आईसीसी विमंस टी20 वर्ल्ड कप मा खेलिहैं। फातिमा सना अपने तीसरे आईसीसी विमंस टी20 वर्ल्ड कप मा हिस्सा लेिहैं अउर लगातार दूसरी बार टी20 वर्ल्ड कप मा टीम क कप्तानी करिहैं। एकरे पहिले उ 2024 मा यूएई मा भये पिछले सीजन मा भी टीम क अगुवाई किहे रही।
2 अभ्यास मैच खेलिहैं
इंग्लैंड अउर वेल्स मा होय वाले आईसीसी विमंस टी20 वर्ल्ड कप से पहिले पाकिस्तान महिला टीम सनीचर, 6 जून का श्रीलंका अउर मङ्गलवार, 9 जून का स्कॉटलैंड के खिलाफ दुई अभ्यास मैच खेलिहै। दुनउ मैच डर्बी मा होइहैं। पाकिस्तान अपने अभियान क शुरुआत 14 जून का बर्मिंघम के एडजबेस्टन मा भारत के खिलाफ करी। दूसरा मैच 17 जून का उहे मैदान मा दक्षिण अफ्रीका के खिलाफ होई। एकरे बाद पाकिस्तान 20 जून का हैम्पशायर बाउल मा बांग्लादेश से भिड़इ बरे साउथेम्प्टन जाई। चौथा मैच 23 जून का लीड्स के हेडिंगली मा ऑस्ट्रेलिया के खिलाफ होई, जबकि ग्रुप स्टेज क आखिरी मैच 27 जून का ब्रिस्टल के ब्रिस्टल काउंटी ग्राउंड मा नीदरलैंड्स के खिलाफ होई। सब ग्रुप से सबसे ऊपर वाली दुई टीमें सेमीफाइनल बरे क्वालीफाई करिहैं। ई मैच 30 जून अउर 2 जुलाई का आयोजित कीन जाइहैं। फाइनल 5 जुलाई का लंदन के लॉर्ड्स क्रिकेट ग्राउंड मा खेला जाई।
पाकिस्तान के मैचन क शेड्यूल
14 जून बनाम भारत, बर्मिंघम
17 जून बनाम दक्षिण अफ्रीका, बर्मिंघम
20 जून बनाम बांग्लादेश, साउथेम्प्टन
23 जून बनाम ऑस्ट्रेलिया, हेडिंगली
27 जून बनाम नीदरलैंड्स, ब्रिस्टल
15 सदस्य वाली टीम
फातिमा सना (कप्तान), आलिया रियाज, आयशा जफर, डायना बेग, एमान फातिमा, गुल फिरोजा, इरम जावेद, मुनीबा अली सिद्दीकी (विकेटकीपर), नशरा सुंधू, नतालिया परवेज, रमीन शमीम, सादिया इकबाल, सायरा जबीन, तस्मिया रुबाब अउर तुबा हसन।
